Sisternas de Konstantinopla

Konstantinopla, Estanbol de oy, es konosida por sus iglesyas byzantinas, i sus sisternas de agua de luvya. Yo me akodro de sisternas de mi chikes, muncho mas chikitikas de las sisternas ke les vo kontar. Me akodro ke munchos anyos atras mos ivamos a Halki, para pasar el enverano. Debasho de kaji kada kaza, aviya una sisterna. Las sisternas eran komunes, i se inchiyan de agua de luvya ke viniya del tejado. Enriva de estas sisternas se topava un kapak, a vezes burakado, i un chikrik kon una kuedra para abashar un kuvo i inchirlo kon la agua de la sisterna. Esta agua se utilizava para gizar i tambien para los echos de kaza.

Agua para bever se tomava del Saka. Estos Sakas, de vez en kuando, se puediyan ver por la noche serka de las sisternas aleshadas, inchendo sus botas tambien de esta agua. No esto seguro, ama puede ser ke filtravan la agua a sus manera para ke tenga una savor buena. Las sisternas eran muy importantes tambien en los sentros aryento de la sivdad. Antes no aviya apartamentos komo oy. Las kazas eran mas, moradas para famiyas, kero dizir ke famiyas numerozas biviyan en una kaza kon los miembros de la famiya. Las mujeres de estas famiyas kompartiyan el mupak, i si teniyan una taracha en el etaj de ariva, era para enkolgar el lavado.

Aya tambien, la ropa deviya de ser bien lavada, klaro ke lavada a mano, i la ropa blanka devia de ser limpya djaspe, sin kualkiera mancha. El mal avlar no mankava i las ermueras kon las esfuegras no siempre se pasavan bien. Tornaremos a muestras sisternas bizantinas, grandes, imensas, ke se pueden dainda vijitar i ver. Una de estas sisternas es la Sisterna Undida del siglo 6 de muestra era (Yerebatan Sarnıcı). Una sisterna bastante grande i elegante konstruida por el emperador Justinyano en el anyo 532. Tiene 336 kolumnas i kaji todas tienen kapiteles de stilos diferentes i bazas para sostener estas kolumnas en medidas diferentes. 2 de estas bazas tienen la kara de la Medusa.

Ken es esta Medusa? En la mitolojiya grega, las Medusas fueron inventadas por el eskritor Hesiodes del livro Theogonya, la Istorya de los Dioses. Una parte interesante de la istorya de las medusas esta eskrita por Ovide, en su livro yamado ’’Metamorfozes’’. Sin entrar a los detalyos, la mitolojiya grega kree ke un mansevo gibor, Perseus, sea mandado al lado de la Medusa, ke tenia los kaveyos en forma de kulevras i una fuersa invensible de tornar en piedra a kualkier ke la mirava. Perseus penso a un plano para matarla sin ser atakado. Un diya ke la Medusa estava durmiendo, Perseus tomo su eskudo/magen para utilizarlo komo espejo i lo metyo delantre de la Medusa endormida.

Kuando la Medusa se despertyo, avryo los ojos i se vido en el eskudo. Al momento se petrifiko i Perseus pudo kortar la kavesa de la Medusa para trayerla a la diosa Atena. Atena siempre utilizo esta kavesa de la Medusa komo medayon sovre su pecho. La mitolojiya kon sus konsejas es un pozo sin dip. Otra sisterna ke keda serka es la Sisterna de Mil i Una Kolumna. El nombre ya mos da una idea de su amplitud. Klaro ke no se deve de fiyar a kada nombre ke se da i a lo ke meldamos. Estas kolumnas eran solamente 224 i oy en diya kedan 212. Fue konstruida por el Emperador Konstantino.

Las kolumnas son interesantes por ser formadas de 2 kolumnas separadas, adjustadas una ensima de otra. Oy en diya esta sisterna es un muzeo i se puede vijitar. Otra sisterna serka de ayi, es la Sisterna Şerefiye ke fue rezin restorada i avierta a la vijita del publiko. La sisterna tambien esta sirviendo komo sala de konsierto i es la unika sisterna ke tiene un asensor moderno i esta al servisyo del publiko. Şerefiye se topa debasho del edifisyo ke keda al lado del Konservatoryo de la Munisipalidad. Esta sisterna fue konstruida por el emperador Theodosio en los anyos 428-443 de muestra era. Otra sisterna, siempre en la sivdad antigua, en el sentro de Sultanahmet, es muy orijinal i se topa debasho de un sentro komersyal yamado Nakkaş.

Fue restorada por los proprietaryos de este mismo sentro. Sisternas Bizantinas son munchas en Estanbol. Una de estas keda serka de Edirnekapı, ke es konosida komo el kampo de futbol del ekipo Karagümrük. Esta sisterna era una de las ke kedavan al ayre libre. Otra sisterna ke no se vijita keda debasho de la Iglesya/Meshkita Zeyrek. De afuera, a lo largo del kamino, se ven solo las paredes fuertes de la sisterna. Al pareser ke tenemos en Estambol mas de 100 sisternas. La agua es una de los elementos primordiales de la vida. En Turko se dize ‘’Su gibi aziz ol’’! Seas bendicho komo la agua!