La Biblioteka de Aleksandriya

Kuando Alexandro el Magno murio en el anyo 323 antes de muestra era, la dinastiya de los Ptolemes empeso a kontrolar Ejipto. El Rey Ptoleme I establesyo la kapital en Alexandriya i empeso a konstruir la famoza biblioteka ande aviya miles de livros. En el anyo 415 de muestra era, Kirilos de Alexandria, el famozo papaz de akeya epoka, mato a Hypatia, la famoza mujer filozofa, matematika, astronoma i fue degoyada komo una bestia en la iglezya de la sivdad. Mizmo si Kirilos no fue direktamente el ken la mato, fue el responsable de esta matansiya porke Hypatia era una persona intelektual ke bushkava la realidad, i no se espantava de dizir lo ke pensava.

Eya era la primera mujer enteresada en las matematikas i en la filozofiya. No olvidar ke sin matematikas no es fasil de entender la filozofiya. Hypatia era grande savia i dava konsejos a los dirijentes, inkluzo al rey Ptolemeos, ke no tenia buenas relasyones kon el papaz Kirilos. Hypatia era pagana, ma lo mas de sus elevos eran kristyanos. Eya tenia grande toleransya por eyos i se aviya echo el simbolo del feminizmo i de los “derechos de la mujer”. El papaz Kirilos se selava muncho de Hypatia porke era mas onorada ke el en el Imperio Romano del Este. Eya toma esta virtud de su padre Theon, ke tanbien era profesor de filozofia i de siensya en Alexandria.

El fue el ke predikto el eklipso del sol i de la luna del anyo 364. Alexandria fue un sentro kultural muy importante desde Alexandro el Magno ke dyo orden de konstruir un sentro ke se yamava ‘’Muzeon’’ o el Sanktuario de las Muzas. (Muzas=fadas de inspirasyon) Es este sanktuaryo ke se izo la Biblioteka mas grande del mundo de akeyos diyas. Fue un sentro komo la Universitaded de oy, tenyendo diksyonaryos, ansiklopedias i utensiles de siensya i de astronomiya i todo lo ke puediya tener de menester el investigador, el bushkador de siensya. Kuando Aleksandro el Magno muryo, su imperyo fue dividido entre los 3 komandantes: Seleusis, Antigonus i Ptolemeos.

Seleusis tomo la parte este de Imperyo teniendo Babilonya komo kapital; Antigonus Monoftalmus (un solo ojo) se apropriyo de Makedonya, de Gresya i de Anatolya i Ptolemeos fue el Governador de Ejipto, azyendo Aleksandria su kapital i trayendo el sepulkro de Aleksandro el Magno a la kapital. La urbanizasyon de la sivdad empeso de una manera muy planifikada. El proyekto mas grande de Ptolemeos era la konstruksyon de la grande biblioteka desde el anyo 306 antes de muestra era. Del empesijo ke el arekojo rikezas immensas de Mezopotomya, de Persya, de Gresya, de Roma i de Ejipto. Asta ke se kemo en el anyo 642 de muestra era, esta biblioteka era el uniko sentro de kultura i de ensenyansa i la unika fuersa filozofika i spiritual detras del mundo del Judaizmo i del Kristyanizmo.

Los primeros siglos despues del anyo 306, la biblioteka fue el sentro de influensya de los filozofos Aristo i Platon. En los primeros 150 anyos de muestra era, la biblioteka fue influensada por el famozo filozofo djudyo Philo. Despues fue la influensa de lo ke se yama ‘’Eskola de Aleksandria’’ asta ke se kemo, dominando el mundo intelektual. Ptolemeus trusho de Atenas un profesor ke se yamava ‘Dimitrios de Foleron’’ para ke dirije este proyekto. En este proyekto no solo aviya lugar para los livros ama aviya tanbien una Universidad para estudios. Una koza maraviyoza era el katalogo de la Biblioteka yamado ’’Pinakes’’. El titulo kompleto del Pinakes era asi: “Las tablias de las maraviyozas ovras de toda la sivilizasyon Grega’’.

En grego, Pinakes kere dizir: Tablia. Solo este katalogo, el Pinakes, era formado de 120 royos ande todo el lavoro de la biblioteka estava rejistrada kon disiplina kon una buena deskripsyon de kada ovra. Todas las ovras estavan identifikadas kon sus titulos, el nombre del eskritor, el lugar de nasimyento de eskritor, los nombres de los ke enfluensaron i ensenyaron al eskritor, una korta biografiya i algunas otras ovras del mizmo eskritor, las fuentes de konosimyento de esta ovra. Ansi este katalogo fue el primer en la sivilizasyon oksidental komo la Bibliya ke Gutenberg ke imprimo en el siglo 15. Ansi fueron fiksados por siempre las leyes de un buen katalogo.

En akeya epoka la biblioteka tenia 500.000 livros i aze 2000 anyos los livros suvyeron a kaji 1 milyon. Uno de los direktores de esta biblioteka era el famozo filozofo Eratostenes ke era el eksperto en las matematikas, en geografika, en astronomiya, en filolojiya, en istorya i en poeziya. Era konosido komo el savyo despues de Plato. El fue el ke invento la manera para mezurar la sirkonferensya del mundo. Un otro direktor de la biblioteka era Aristofanes de Byzantion. Un ombre jenial ke puediya komemorar todo lo ke meldava komo una fotografiya i puediya resitar en el momento lo ke meldava. Lo envitaron a ser direktor de la otra famoza biblioteka de Pergamum (Bergama) i Aristofanes lo aksepto.

Ama de selo, el rey Ptolemos V lo metio al prezo para ke no se vayga a Pergamum, porke aviya una grande konkurensya entre las 2 bibliotekas. Ptoleamos para ser siempre los mijores, no permityo de eksportar el papirus ke eran ojas de planta ande eskrivian. Ama la sivdad de Pergamum, para pueder eskrivir, inventaron el ‘’Pergamino’’ ke es lo ke yamamos ‘’Parshomen’’ (parşömen), kuero de vaka o de kavra, lavorado muy fino. Los royos de la Tora tanbien son eskritos sovre Pergamino. Los dalkavos siglos del Imperio Romano kon los primeros siglos del imperio Byzantino, asta la yegada de los Arabos, los dirijentes politikos no fueron del todo kapachis a mantener el nivel intelektual ke izo la glorya de la biblioteka, porke estos ultimos dirijentes abandonaron la ‘’Razon’’ i se metyeron profundamente en la ‘’Relijyon’’ malgrado ke djente komo Philo, Hepatia bivyeron en esta epoka.

Philo Judaus pertenesiya a una famiya Djudiya muy importante de Aleksandriya. Su ermano era el prezidente de la komunidad djudiya de esta sivdad. Por esta razon, Philo pudo eskrivir munchos livros. Esto todo lo savemos grasias al istoryador djudyo Josephus ke bivyo en la mizma epoka. Tenia grande entuzyazmo por el arte grego i su sivilizasyon. Se kree ke Philo estudyo en un jimnasyum ande no aviya una edukasyon djudia. Se enteresava en los grandes eskritores komo Sofokles, Euripides i mas i mas en la filozofiya, en las matematikas i en el teatro. En las diskusyones entre la ‘’Halaha’’ djudia i las leyes grego-romanas, el era de la parte de las segundas.

Apoyava a los Esenis ke biviyan solitaryos, i ke refuzavan la rikeza. El fue el prezidente de la delegasyon ke yevo keshas al emperador Kaligula despues del pogrom ke afito en Aleksandriya kontra los Djudyos, i ke munchos de los derechos ke tenian fueron abolidos. Kuando los Arabos konkistaron Ejipto i klaro Aleksandria, los komandantes de los Arabos se yevaron lo mas de los livros de la Biblioteka antes ke la kemen. Ansi fueron tradusidos las ovras de Aristo, de Plato i mas… I fueron los Kruzados ke se ambezaron de los Arabos esto todo i ke transmetyeron al mundo.