Despues de la Oskuridad

Munchos kreyen ke la Edad Media fue una epoka ande la razon no egzistyo i ke todo se rejiya solo a traves de la superstisyon. Los ke pensaron ansi no se dyeron kuento ke estan avlando solo por la rejyon de Evropa. Ama en esta rejyon aviya un payis ke desho munchas kozas a la umanidad. Este payis fue el Imperio Bizantino ke en realidad es el Imperio Romano del este ke bivyo asta el siglo 15. Antes de todo el Imperio Bizantino ande la djente avlava el Grego, transmetyo la kultura i la filozofiya de la Gresya Antigua. Ya savemos ke la kultura i la saviduriya de la biblioteka de Aleksandriya fue konosida a traves de los Arabos.

Klaro ke no todo fue tradusido al Arabo. Lo mas de los eskritos de la Gresya antigua fueron kopyados por los Soferim del Imperio Bizantino, porke i eyos avlavan la mizma lingua. Los Bizantinos no tuvyeron dingun problema para entender i dar el sentido korekto de los eskritos de la Gresya Antigua. Ademas la biblioteka de Aleksandriya no era la unika biblioteka en el mundo del Mediterraneo. La biblioteka de Pergamon (Bergama) era un rival muy grande. La konkurensya entre estas dos bibliotekas era enorme. Ansi los Arabos transmetyeron lo ke no fue kopyado en las otras bibliotekas para ke estos eskritos no sean pedridos para siempre. No olvidar ke las bibliotekas de entonses no konservavan estudios sientifikos ma solamente estudios literarios.

A parte de estos tekstos literarios, los Bizantinos introdusyeron el ‘’Piron’’en las kostumbres de komer de kada diya desde el siglo 4 de muestra era. Los Persos kopyaron esto en el siglo 9 i los Italyanos en el siglo 11. I Esto muncho antes de otros payises Evropeos porke los Italyanos tuvyeron grande simpatiya para los makarones, i kon el piron de tres o kuatro dientes, se puediya komer kon mas fasilidad, kon mas elegansya i ijyena. Los Bizantinos eran amantes de arte i buenos arkitektos ke konstruyeron las grandes kupolas kon koshés ke yamamos ‘’Pendantivas’’. Tenemos en Estanbol la ovra la mas famoza del mundo del siglo 6, ‘’Santa Sofia’’ o Ayasofya.

La kupola de Ayasofya tiene un diametro de 31-32 metros. Esto era un milagro por los arkitektos del siglo 6 i kontınua a illuminar los arkitektos de oy. Tambien konstruyeron pontes kon arkos puntudos para pueder sostener mijor el pezo del ponte. Inventaron lo ke yamamos ’’El fuego Grejua’’ ke es el Fuego Grego. Embiyavan kon filechas un trapo embibido de nafta, lo ke aziya kemar los barkos o los soldados ke gerreyavan. Inventaron el ‘’Trabucho’’ (Mancınık) embiyando leshos eksplozivos en flamas i balas de piedra. No olvidar ke en akeya epoka la sivilizasyon en China kon siertas dinastiyas importantes, en Amerika kon los Mayas, Aztekas i Inkas, no eran inferyores a los de Evropa.

Lo ke fue oskuro en Evropa, fue la mankura de komer i la epidemia de la Pesta. La Pesta i la Lepra en el siglo 14, kavzaron tanbien el mal trato a los Djudyos, echando la kulpa de la epidemiya a eyos. Oy lo ke yamamos las ‘’Brushas’’ de la Edad Media savemos ke era una kalomniya. I para vengarsen, inventaron ke siertas mujeres eran Brushas i aziyan echizos. Malorozamente algunas mujeres fueron kemadas bivas bivas. En esta mizma epoka tenemos nombres des filozofos, eskritores, sientifikos ke trokaron el punto de vista del mundo. Entre unos kuantos de eyos puedemos akodrarmos de Shakespeare, Galileo, Spinoza, Newton ke dyeron luz al mundo, i ayudaron a adelantar una grande parte de la umanidad.

En munchos livros meldamos ke en la Edad Media la djente no se lavavan i eran muy suzyos, yenos de kanyo. Oy sea en eskavasyones arkeolojikas, sea en manuskritos muevos topados de akeya epoka, savemos ke los banyos romanos tan famozos fueron empleados i por los Bizantinos. Klaro ke la “Ijyen” i la frekuensya de lavarse no era tal komo oy, ama lavar se lavavan mizmo en los kazales rurales. Mas i mas, los Djudyos se aparejavan al Shabat lavandosen i ansi eran limpyos para aresivir el diya sakrado. Lo ke tambien no se dize es ke los banyos publikos estavan siempre al lado de los ornos de pan para aprovecharsen de la kalor del orno.

Munchas personas se aprovechavan del banyo para lavarsen i komer en el banyo bien kayente. Me akodro de mi chikez, ke kuando mi mama me yevava al banyo, se yevava tambien unas kuantas kozikas para komer kon las amigas ande se enkontravan i se kedavan oras, komo si fuera un piknik. Lo mas kuryozo era ke se yevavan tambien Bimbriyo. Es ke el Bimbriyo se rompiya (no kortar) en la pila del banyo, i se diziya ke el Bimbriyo tenia otra savor i saliya mas suli i savrozo, kuando se rompiya de esta manera. Kreyiyamos ke en la Edad Medya todos pensavan ke el mundo era yano. Los intelektuales de akeya epoka saviyan muy bien ke el mundo era redondo.

Esta realidad ya se saviya desde la Gresya Antigua. En todas las reprezentasyones de los Emperadores Bizantinos vemos ke el Emperador tiene en su mano el globo terestro, (forma redonda del mundo) kon una kruz ensima. Esto keriya dizir ke el kristyanismo iva dominar el mundo. Entre otras inovasyones de la Edad Media se pueden kontar la forma de imprimir livros. Los Djudyos trusheron de Espanya este lavoro a Turkiya. Espejos de vidro, antojos, velas de barkas, los molinos de agua i de viento, papeles ke sirvyeron para pagar (chekes) eran utilizados i topados en esta epoka yamada oskura. Lo ke izo yamar la Edad de la Oskuridad fue lo mas la lucha i las intrigas entre los dirijentes para no pyedrer sus poderes i para reynar sovre una sosyedad inkulta.

Una otra koza ke aze dar este titulo de oskuridad fue ke el pergamino i el papirus en esta epoka se izyeron muy eskasos, se topavan muy poko porke era muy karo de trayer el papirus i de fabrikar el pergamino. Es por esta razon ke tenemos pokos detalyos eskritos sovre esta epoka. Lo ke savemos es ke kada epoka tiene sus kalidades i sus defisyensas. La oskuridad se aklara kon la luz de la esperansa ke ilumina los kaminos, kon sus estudios sientifikos, lavoros de arte i ideas filozofikas. Mayo 2020