Gladyator Djudyo

En las ekskavasyones arkeolojikas ke se izyeron en Pompei, Italya, enkontraron un kasko (helmet) ande aviya en su frente, una menora, mijor dicho, un arvole de palmera kon siete ramas, un símbolo ke se ve en las monedas de Judea. Un kasko ke se aviya probablemente echo kon la destruksyon de Yerushalayim por los Romanos i probablamente un kasko ke pertenesyo a un Gladyator Djudyo. Este símbolo no fue enkontrado en los kaskos de los otros gladyatores en los kualos se ven solo símbolos paganos. Las monedas kon palmera apartenesian a los emperadores Vespasyanus i Titus i a los Djudyos ke kombatyeron en la gerra kontra los Romanos de los anyos 66-74 de muestra era.

Asta la guerra de Bar-Kohba, el arvole de palmera fue el símbolo de los Djudyos de Judea. Por esto puedemos dizir ke este kasko devia de apartener a un Gladyator Djudyo. Seria posible ke un Djudyo sea gladyator? Normalmente no, ama savemos a través del istoryador Josephus ke munchos Djudyos ke fueron prizyoneros de los Romanos en la gerra de los Makabim, tuviyeron de kombatir komo gladyatores i los ke teniyan mazal de sovrebivir, podiyan ser libres i tener el permiso de yevar su proprio kasko. El kavzo de este gladyator djudyo anonimo es mas espesyal porke tuvo la posibilidad de pueder meter su menora en forma de palmera, pueder ir Pompei, i desgrasyadamente murir debasho de las lavas del Vezuvio.

Josephus mos dize i otra koza: Herodes aze 2000 anyos organizo olimpiyadas kada sinko anyos a la onor de Augustos, el primer emperador romano, en Yerushalayim i en Kisarya, una sivdad al bodre del Mediteraneo tenyendo mismo nombre ke “Kayseri”. Pompei no era una sivdad tan importante komo Roma, ma se enkontraron enskripsyones kon nombres Djudyos komo “Yudaikos” i “Mari”. Esto mos amostra ke el puevlo de Pompei parese ke era bastante tolerente para akseptar djente de otra etniya i de otra kultura. Este kasko fue enkontrado en la kazerna (kishla) de los gladiyatores, debasho de las lavas i sinizas ke desho la erupsyon del volkan “Vezuvio” del anyo 79 de muestra era.

Lo ke es interesante en este kasko es el simbolo de la Menora ke se ve en su frente, komo un arvole de datiles kon ramas de datiles. Se enkontraron munchos kaskos komo era una kazerna, ma este era el uniko ke teniya este símbolo al lado de los otros kaskos ke estavan bordados kon símbolos de la ikonografiya pagana. Es ke este símbolo de arvole de datile fue akseptado en akeya epoka komo la bandyera de Judea ke se veiya tambien en las monedas de la misma jeografiya? Solo, no konfundir kon las monedas ke fueron produsidas en las sivdades komo Kartegena (Afrika, Tunisia), Efeso ande se ve el arvole de datiles kon la diosa Artemisa.

Una eksepsyon es la moneda topada en Tiberiades, sivdad fraguada a la onor del emperador Tiberius, ande el arvole de datile sinyifika la agrikultura mas ke la jeografiya. Se kreye ke este gladyator fue un soldado djudyo ke fue arevatado por los Romanos en la guerra del anyo 70 i ke lo yevaron a Pompei komo prizyonero de gerra i para salvarse de esta penalidad, deviya de luchar komo gladyator i venser sus rivales. Una vez en Pompei, siendo komo un ero (Gibor), no tuvo miedo de tener un kasko amostrando su apartenensya djudiya. Syempre segun Josephus, los djudyos gladyatores en Yerushalayim i Sezarea, no permetiyan la matansiya. Los kriminales djudyos eran kastigados en la Kruz komo los kristyanos i no en la arena del amfiteatro komo un gladyator.

Un egzemplo similar vyene de la komunidad djudiya de Smyrna (İzmir) del segundo siglo de muestra era. Djudyos se enkontran en todos los siglos, en todas las nasyones, en todas las areas i en todo modo de ofisyo; lavorando kon ardor i yegando a todo modo de rango importante ke vemos también en muestra era. Esperamos ke muestros desendyentes yegaran a las mas altas misyones kon muncha dinyidad i orguyo trayendo a todos la ardor de yevar i pasar la torcha de la glorya i pas a las jenerasyones futuras. Adaptado de un artikolo de Samuel Roca ke nasyo en Milano Italya, izo aliya a Yerushalayim i se izo kurator del Muzeo de la Tierra de la Bibliya en Yerushalayim.