Leyes Bizantinas sovre los Djudyos

Asta ke yego el Emperador Konstantino el Magno, los Djudyos no sintyeron ninguna kesha de ser minoriyas en sus proprias tierras. Kuando Konstantino el Magno desidyo de liberalizar los kreyentes kristyanos, i ke el movimiento relijyozo empeso a trokar en favor de eyos, esta mueva relijyon ke se yamo Kristyanismo después del Konsilyo de Nisea (İznik) se espandyo rapidamente en todo el Imperyo Romano asta ke el Emperador Theodosyo I, deklaro ke esta relijyon iva ser la relijyon ofisyal del Imperio. Asta el segundo Theodosius ke kito el “Codex Theodosianus” ande se ven las leyes, algunas protejando las Sinagogas ke ya egzistiyan i otras prohibiendo la restorasyon de estas i la konstruksyon de las muevas, siertas vezes los Kristyanos fueron kastigados por destruír o vandalizar Sinagogas i otras vezes fueron apoyados por las otoridades Bizantinas de esta epoka.

Kon el Emperador Theodosios I, los Djudyos fueron konsiderados komo minoriya i empesaron a tener restriksyones en la praktika de la Alaha. Un dekreto de Konstantino en el anyo 331 dize ke los dirijentes de la Sinagoga van a kedar afuera de las ovligasyones publikas para pueder praktikar las leyes de los Djudyos. Este tipo de dekretos mos amostran ke al prensipyo del reynado Bizantino, las sinagogas estavan al mizmo nivel ke la iglesias kristyanas. En el anyo 397, una ley promulgada por el Emperador Arcadius, avla de los “ilustros patriarkas, de los “archisinagoges”, de los “ekspertos de la relijyon” sin dar a entender de ken se trata, ke tambien van a kedar afuera de las ovligasyones publikas.

La primera ley ofisyal salyo en el anyo 393 por el Emperador Theodosio I dizyendo: “A los dirijentes, i komandantes militares del Este del imperio, {la Sekta Djudiya no esta proibida por ninguna ley}. Esto lo dize para azer akodrar ke uvo algunos atakes a las Sinagogas en syertos lugares, sin presizar los sitios i las personas ke las izyeron al nombre de la relijyon kristyana. El antisemitismo empeso kon el famozo papaz, “Yani Krizostomos”, “St. Jean Chrisostome” ke kere dizir “Boka de Oro”, kon los ocho sermones tratando las Sinagogas de teatro i bordel, de lugar de ladrones i bestyas. En 388, Sinagogas fueron kemadas i dinguno no fue enkarselado.

Mezuras fueron tomadas por los Emperadores Arcadius en 397, Theodosius II en 412, por Honorius en 423 para protejar Sinagogas i Djudyos. Estas mezuras fueron tomadas solo en algunas partes del Imperio i no en todo el teritoryo romano. No se save muy bien si esta proteksyon se izo por el amor ke tuvieron por los Djudyos o si era para mantener la paz romana. En todo kavzo despues del anyo 415, los emperadores prohibieron la konstruksyon de muevas Sinagogas i enkorajaron la destruksyon de Sinagogas en lugares kon poka povlasyon djudiya. Se konose el dekreto de Theodosyo II kontra Gamaliel, un haham de Konstantinopla, dezonorandolo de su estatura de “Prefekto Onoraryo” sin mensyonar por ke razon fue kastigado.

Otras prohibisyones ke vinyeron kon este dekreto fueron la prohibisyon de azer brit-mila a los kristyanos, de tener esklavos kristyanos, de djuzgar konfliktos entre Djudyos i Kristyanos. El dekreto se eskapa kon estas palavras: Dinguna mueva Sinagoga se va konstruir, las ke estan, van a kedar tal komo estan”. En el dekreto del anyo 438 se melda esto: “No se van a atrever de konstruir mueva sinagoga, porke si lo azen van a pagar una multa de 50 piesas de oro, ama deven de saver ke tienen la permisyon de reparar las ruinas de la sinagogas abandonadas”. Kon este dekreto se entiende ke keriyan ke no se veyga ruinas en la sivdad i ke los Kristyanos no utilizen estos espasyos abandonados.

En el siglo 6, en la epoka del Emperador Justinyanos ke konstruyo la famoza Santa Sofiya, los Djudyos de “Amida”, sivdad ke oy se yama “Diyarbakır” tuvieron de azer una grande donasyon para porotejar la Sinagoga i ke los kristyanos puedan konstruir iglezyas. En esta mizma epoka entre los siglos 4 i 6, oy, los arkeologos estan enkontrando en el norte de Israel, en Galil a Elyon, ruinas de sinagogas kon motivos artistikos de mozaikos komo los de la Sinagoga de Sardis/ Sart. Se kreye ke esta proteksyon, mismo flosha, de las sinagogas i de los djudyos en jeneral, era para mantener la Paz Romana i no tener dar i aver kontra las reaksyones a los Djudyos.

Adaptado i adjustado de un artikolo de Catherine Hezser.