Kozas de Ayer i de Oy

Oy tenemos algunas kozas ke empleyamos sin darmos kuento ke egzisten desde munchos anyos, mizmo desde munchos siglos. Entre tanto, ay un monton de kozas ke mos vinyeron de China. La seda El pedasiko mas vyejo de seda ke fue deskuvyerto en China tyene data del anyo 2570 A.E.K. (Antes de la Era Komun). La transmisyon del sekreto de la produksyon de la seda a traves del kapuyo a las otras sivilizasyones tomo munchos siglos, miles de anyos, aunke las envestigasyones de los anyos dalkavo, mos amostran ke i en India i Pakistan de oy, la povlasyon ke biviya aya, konosiya la seda. La seda fue en China un enstrumento ke se utilizo adjustando al papel, otra koza inventada por los chinos, se utilizo komo bilyete de banka (paras en papel).

La seda izo ke se forme un kamino espesyal salyendo de China asta Evropa i se yamo “La ruta de la Seda”. La porselana. Nasyo en China entre los anyos 200 A.E.K. (Antes de la era komun) i 200 E.K. (Era Komun). En Evropa tuvo su sukseso despues de los siglos 17, 18, en Fransya i en Almanya. La polvora ke fue empleyada para armas Nasyo en China yene en las mizmas datas ke el papel i ke yamamos el tyempo de la dinastiya de Han. La furcha para los dyentes. Nasyo en China en el siglo 7. La foto amostra una replika de la primera furcha de China. Antes de esto empleyavan pedasikos de lenya komo kurdan, o pedasikos de gueso.

La furcha para dyentes entro a Evropa despues del Renasimyento. Antes, en Turkiya, la djente se lavavan los dyentes kon lo ke se yama Misvak, ke se aze de una rama de un arvole espesyal. Otra envansyon china es la Filandra. Esta palavra filandra kreyo ke vyene del italyano i kreyo ke sinyifika la bandyera ke se kolga en los barkos. El mas vyejo teksto ande se avla de filandra es del siglo 4 A.E.K. (Antes de la Era Komun). Ama este teksto se eskrivyo muncho mas despues de la envansyon de la primera filandra. Al empesijo el uzo de la filandra era militar. Despues lo empleyaron para embiyar mesajes, sinyalar alguna koza, o mezurar las distansyas, a espantar el enemigo.

La filandra yego a Evropa despues del siglo 12. En la parte Asyatika de Estanbol, en Üsküdar, egziste un muzeo de filandras ke organiza konkursos de filandras, igual komo se azen en otros payizes komo China o Japonya. La Para en Papel. Los chinos empesaron a empleyar la para en papel desde el siglo 7. El pezgo de la para metalika izo ke los chinos izyeron emprimir en papel el orden de pagar la mizma suma al komersante ke se iva de un lugar al otro. Este sistem vino a Italya en el siglo 14, i se aksepto por todos en el siglo 17. El papel de tualet. Los chinos lo konosiyan desde el siglo 2 A.E.K. (Antes de la Era Komun).

Los Romanos empleyavan una espondja atada a un palo, komo en las latrinas ke vemos en Efes i otras ruinas. En el Medyo-Oriyente i en el imperyo Otomano, era la agua ke serviya de limpyeza. El plombaj de dyentes. En China se konosiya desde el siglo 7. E.K. (Era Komun). El doktor chinezo, Su Gong, en el anyo 659, eskrive sovre un plombaj de Stanyo (Kalay) i Plata para inchir los burakos de los dyentes. El Chay. Es una planta ke los chinos utilizaron desde el siglo 27 A. E. K (Antes de la Era Komun). El chay yego a Evropa despues del siglo 16. De China paso a Japonya, a Indiya, i de ayi a Evropa.

En primero fueron los misyonaryos de Portugal ke trusheron esta planta. Despues fueron los Hollandezos, los Inglezes, los Amerikanos, ke protestaron a los Inglezes, echando a la mar kashas de chay. El chay entro al Imperyo Otomano en el siglo 19. Ama la produksyon lokal empesa del anyo 1938 en Rize. Oy en Turkiya el chay es la bevida ke vyene despues de la agua. El piron. La arkeolojia topo en China el piron desde el siglo 24 A.E.K. (Antes de la Era Komun). Este piron teniya solo 2 dyentes. Evropa konosyo este elemento de kozina a traves de los Bizantinos. De los Bizantinos paso a Italya i despues a los otros payizes.

Los Otomanos, syendo vizinos, se ambezaron antes de los Evropeos. Es por esto ke los Djudyos ekspulsados de Espanya, konosyeron el piron despues de vinir a las tyerras de los Otomanos.