El Diya de la Mujer

En la alta antikuedad estamos vyendo ke la mujer era adorada komo diyosa porke dava luz a kriyos, tal komo la tierra da lo ke sembras. Ansí, simbolizava la fertilidad. Por esto topamos munchas statuas de mujer chikitikas kon grandes pechos, grandes pyernas i sus partes jenetikas kon egzajerasyon. I esto tambyen mos da a entender ke la mujer fue igual al ombre, en las epokas ke yamamos “Matriarkal”. Kuando el ombre empeso a sintirse mas fuerte ke la mujer, la umanidad paso a ser “Patriarkal”, asta el siglo 20, ke la mujer torno a demandar de muevo su igualdad. En 1910, Clara Zetkin, nasida Clara Josephine Eissen, en la “Konferensya Enternasyonal de las Mujeres Sosyalistas” ke se izo en Kopenhag, Danimarka, demando a estableser el diya 8 de Marso, diya ande muryeron munchas mujeres en el insendyo de la fabrika de tekstil en 1857, komo “DIYA MUNDIAL DE MUJERES”.

Su demanda fue akseptada a la unanimidad. Este diya se izo ofisyal en la Unyon Sovyetika desde 1921 asta 1965. Por fin, fue en 1977 ke “LAS NASYONES UNIDAS” ofisyalizaron este diya komo “DIYA ENTERNASYONAL DE MUJERES”, envitando todo los payizes miembros de la Unyon a selebrar este diya en favor des los “DERECHOS DE MUJERES”. En 61 payizes del mundo, este diya es un diya de fiesta ande no se lavora. Turkiya no esta entre estos payizes. En Anatolia, ke es Turkiya de oy, desde la pre-istorya, tenemos munchas de estas chikitikas estatuas de mujeres enteras desnudas, kon pechos i pyernas grandes, dando luz o azyendo mamar kriyos. Estatuas konsideradas komo diyosas i yamadas “Diyosa Madre” fueron enkontradas en variyas rejyones del payis.

Estas estatuas simbolizaron la fertilidad. Todo esto lo dizimos bazandomos sovre teoriyas, porke no tenemos dinguna koza eskrita sovre esta epoka. Los primeros tekstos eskritos sovre mujeres en Anatolia vienen kon los ke los Ebreos yamaron Hittim i ke mozotros yamamos Hitit. Sea en los gravados ensima la roka, sea en las tavlias de barro, vemos ke el rey i la reyna syempre están asentados lado kon lado, es dizir ke la reyna esta syempre al lado del rey. Ay tavlias ke eskriven sovre las reynas ke governaron. La reyna mas konosida es la reyna Puduhepa, ke fue la espoza de Hatushili III, el rey ke firmo el tratado de Kadesh, tratado ke se konsidera komo el primer tratado de paz en la istoria mundial.

Entre los rolos de la mujer en los Hittim, lo mas importante era de ser doktora. Eya teniya el dover de kurar los hazinos. Tambyen otro rolo importante era de dirijir las seremoniyas relijyozas kon bayles i kantes. Eyas saviyan tanyar instrumentos de muzika muy paresidas al <bağlama>, al <tef> (Pandero), a las <kucharas> (kastanyetas), al <zurna> (klarineta), de oy. Klaro ke no tenemos dinguna nosyon de la muzika de esta epoka. Ama el sistem de la famiya era un sistem patriarkal i solo la voluntad del padre teniya validez. El kazamyento en los Hittim parese muncho a lo de oy. Antes de kazarsen, deviyan kortar palavra, ser espozados por un syerto tiempo, kazarsen después ke el yerno deviya de dar una suma importante al padre de la novya i trayer el ashugar de la novya a la kaza del novyo.

El sistem de levirat egzistiya i en los Hittim. Los peleos entre ermuera i esfuegra eran muy frekuentes i esto entro a las leyes. Ama la esfuegra era syempre la ke komandava. En Ejipto, de syertos dokumentos estamos entendiendo ke la mujer era igual al ombre en frente de la ley. Eya puedia ser la patrona de su proprio echo, eya puediya divorsar o puediya desidir de ser doktora. Ansí no dependiya ni de su padre, ni de su espozo, ni de su ermano, komo era la tradisyon en otros payizes. El kazamyento no se aziya ni de una forma administrativa, ni de una forma relijyoza. Solo la desizyon de un ombre i de una mujer era sufizyente para formar un matrimonyo.

Aziyan un kontrato de los bienes ke trayiyan. Puediya mantener su nombre i no tomar el nombre de su espozo. Para ser kazados era sufizyente dizir resiprokamente: “Te ize mi Mujer”, “Me izites tu Mujer”. En la Gresya de la antikuedad, una ijika deviya de kazarse a los 15 anyos. Solo el padre dava la desizyon de kazar. Eyas no teniyan dingun derecho ni en la politika, ni en la vida sosyal. Toda sus vidas deviyan de depender o del padre, o del marido, o del ermano, o de sus ijos. Si era bivda sin ijos, deviya de depender del ombre mas serkano de la famiya. Eyas eran la maestra de la kaza.

Dando ordenes a las esklavas i servyentes, devian de filar la lana, preparar i kuzir la ropa de las vestimyentas, kudiar a la ekonomiya de la kaza, i kudiar a las servyentes hazinas. En el Imperio Romano, la mujer tuvo el mizmo destino de la mujer grega. Una diferensya fue ke la mujer grega no puediya salir afuera de su kaza sin una servyente, o ir a un teatro o un djugo sportivo; ma la mujer romana tenia este derecho de salir sola a la vida publika. En syertas partes del mundo, oy en diya egzisten las mizmas restriksyones. Despues de miles de anyos de evolusyon, kaji ke nada no troko debasho del sol.

Klaro ke no devemos de ser pesimistos i no ver komo munchas leyes trokaron en favor de las mujeres i famiyas. Las mujeres ganaron sus otonomiyas finansyeras. De la otra parte, mizmo en payizes adelantados, por diversas razones, ay ombres ke aktuan de manera muy arkaika. Bendicho el Dyo, kon la pasensya i sensya de las mujeres i el instinkto de madre, la aze adaptar a todo modo de kambyo importante. La balansa en todo modo de momentos importantes traye la paz i la serenidad, amor i kerensya a todas i a todos kon la kompreansyon mutual. Ombres i mujeres seyan, inshala, siempre en armoniya. Saver ke las mujeres, kon grandes luchas, tuvieron este diya sakrado ke aze akodrar al ombre “LOS DERECHOS DE LA MUJER”.