Los Kuzarim

Se dyo el nombre de Kuzarim a una tribu Turka ke entro en la istorya mundiyal i en pokos siglos dezaparesyo de la istorya sin deshar ninguna trasa despues de konvertirsen al Judaizmo. Al pareser ke fueron los chinos, kontando la istorya de los Turkos del siglo 6 de M.E (Muestra Era) diziyan ke los desendientes de los Sabarim, una rama de los “Turkos Selestos” (Göktürk), se enstalaron al norte de la Mar Preta, i empleyaron por primera vez el nombre de Hazar. Los Sabarim son los ke dyeron el nombre de Sibirya a la rejyon ke se yama ansi. Se kreye ke ay diferentes eksplikasyones para saver la rais del nombre Kuzari o Hazar.

Unos dizen ke Kuzari vyene de la palavre Turka “gazmak” ke kere dizir “errar” (Irse de un lugar al otro sin enstalarse), (göçebe), (gezer). Otra sinyifikasyon de la palavra “kaz” es una persona ke no es grande i ke tyene los ojos travados “achinados” (komo los chinos) (çekik gözlü). La palavra Hazar, ke en Ruso se dize “Kazar” i en Hungaro se dize “Huszar” kere dizir “Kavalyero”, el ke kavalga un kavayo. En Turko, yamamos el lago Kaspyo = Hazar Gölü. Probablamente porke los Kuzarim se establesyeron al lado del lago Kaspyo, asta el norte de la Mar Preta, dominando una grande parte de Ukranya de oy. Syertos istoryadores pretenden ke los Gurdjis son desendyentes de los Kuzarim ke se konvertyeron a la relijyon Kristyana Ortodoksa.

Komo parte de la rama “Turkos Selestos” (Göktürk), ayudaron los Bizantinos kontra los Sasanidos, los Iranis de entonses. Fue en el anyo 630 ke formaron un Estado independente i se adelantaron bastante en la rejyon de los Kaukasos (Kafkas) apropriyandosen i de la peninsula Krimea. Husrev I, el shah de Iran, diziya ke “Egzisten tres otros imperyos komo el miyo ke son el imperyo Chino, el imperyo Romano (Bizantino), i el imperyo Hazar”. Las relasyones kon los Bizantinos se izyeron tan buenas ke en el anyo 732, una prinsesa Hazar de nombre Chichek, se kazo kon Konstantius, el ijo del emperador Leo i tomo el nombre de Irena, ke kere dizir “Paz”.

El ijo ke tuvyeron, paso al trono del imperyo Bizantino debasho del nombre Leo IV, o “Leo el Kuzari” ke lo vemos en el mozaiko ensima de la puerta imperyal de Santa Sofia de Konstantinopla (Estambol). Esta relasyon entima izo ke los Kuzaris i los Bizantinos kombatyeron endjuntos kontra los Arabos para ke no se aserken de esta sivdad. Los Kuazarim supyeron ser el Estado mas fuerte i mas poderozo del este de Evropa asta el siglo XI, despues empesaron a deskayer. Las razones de deskayer fueron ke la ekonomiya i la unyon del enteryor del payis se bozdeyaron, los atakes de los Rusos se izyeron mas frekuentes i danyozos, la kapachidad de los Turkos ke era de ser “una nasyon militar” se aflako, i kuando los Bizantinos vyeron ke los Kuzarim no tyenen la mizma fuersa i poder, la amistad ke teniyan por eyos troko a ser amistad kon los Rusos, i de ser amigos se izyeon enemigos.

Los Kuzarim no desharon dinguna literatura i no tenemos idea de la lingua ke avlavan. Oy los akademikos pensan ke devriya ser una lingua mesklada del Hungaro, Bulgaro i Turko. La korespondensya en jeneral izyeron seya en Grego, seya en Arabo i a vezes en Ivrit. Al reverso de las tribus Turkas otantikas ke eran militares, eyos se enteresaron mas al komersyo, a la ovra manual, a la agrikultura. Tenyendo la rais Turka, no desharon kompletamente el karakteristiko de los puevlos de Asya Sentral de ser errante (Göçebe). La grande mayoriya bivian en sivdades el tyempo de invyerno i se ivan, kuando viniya la primavera, a las alturas para pasar el enverano en tyendas (Çadır) de feltre (Keçe, fötr).

Una palavra en Kuzari ke se pronunsya “Hukurim” i ke kere dizir “Okurum”: “Meldo”. Se dize ke los Karayim de Krimea i de Polonya avlavan en Kuzari. El kapo del Estado se yamava “Kagan”. El titulo de Kagan pasava de padre a ijo i deviya de apartener a la dinastiya de Asena, nombre mitolojiko de la madre lova ke empeso esta dinastiya. Se kreyiya ke i el Kagan teniya un poder divino. Ama si akontesiya una sekiya o si perdiyan la gerra, el responsavle era el Kagan i munchas vezes podriya ser egzekutido kon la desizyon del konsilyo de los aedados, los vyejos. La mujer del Kagan era kaji su igual i se yamava “Hatun”.

Komo eran buenos soldados, aviya munchos Kuzarim en los palasyos de los Bizantinos, de los Abbasidos, de los Sassanidos komo guardya fidel. Komo las otras tribus Turkas, i los Kuzarim dyeron un karakter divino al diya, a la noche, al sol, a la tyerra, al syelo, enfin kaji a todo. Los dirijentes i los ke estavan al derredor eyos adoptaron la relijyon de Moshe Rabenu, ama en el puevlo uvo unos ke adoptaron la relijyon Ortodoksa Kristyana i otros la relijyon Muzulmana. Ansi la relijyon del Estado era el Djudaizmo ama desharon toda la libertad a los ke pratikavan las otras relijyones monoteistas. Se dize ke uvo dos grupos de Kuzarim.

Unos ke eran muy yakishikli, kon ojos mavi i kaveyo ruvyo i el otro grupo formado de djente morena kon kaveyo preto. Al pareser, los yakishiklis eran los dirijentes, los de ariva, i los morenos los de abasho, el puevlo. Segun el famozo istoryador i viyajero El-Mesudi, ke bivyo en Irak en el siglo 10, aviya 7 djuzgador en Itil, kapital de los Kuzarim; Uno djuzgava los ke kreyiyan al Dyo Syelo, dos de eyos djuzgavan los kavzos de los Kristyanos, otros dos los de los Djudyos, enfin los otros dos djuzgavan los kavzos de los Muzulmanos. El Djudaizmo se desvelopo entre eyos en jeneral kon los Kaganes Bulan i Ovadya.

La ekonomiya era el komersyo. Eksportavan samarras, myel, arena de trigo, esklavos i una koza muy apresyada ke eran las espadas ke fabrikavan. Komo estavan en la ruta de la seda, kovravan impuestos de las karavanas ke pasavan de sus tyerras i de los barkos ke pasavan por sus aguas. Kovravan tambyen una taksa fiksa de los puevlos ke protejiyan. Komo eran de rais nomada, eran ekspertos de kudyar la ganaderiya formada de kodreros, kavras, vakas, i gameyos.. En las monedas de plata ke akunyavan (Prensar la moneda), i ke se yamavan “”Yarmak”, eskriviyan en arabo, a un lado “Arz-el Hazar” “Tyerra de Hazar” al otro lado “Musa Resul Allah”

“Moshe shaliah de Dyo”. Una diskusyon ke ayinda no se eskapo es la teoriya ke los Ashkenazim son los desendyentes de los Kuzarim, i ke el Yiddish salyo en Krimea. Un debate ke tyene munchas kontraversas. Unos dizen ke si, otros dizen ke no. Tambyen otra teoriya dize ke la palavra Ashkenazi se enkontro por primera vez en el Este de Turkiya. Kreyemos ke la Syensya un diya mos va dar la buena repuesta. Fuente: Wikipedia