La Korespondensya Khazar

La korespondensya Khazar es la komunikasyon ke tuvyeron Hasday Ben Ezra ben Yitshak ibn Shaprut, ministro del eksteryor ofisyozo (no ofisyal) de Abdelrahman III, Kalifa de Kordova en Espanya, i Yosef, rey o Kagan de los Kuzarim, en los anyos 950 de la E.K. (Era Komun). Hasday Ibn Shaprut es un doktor, un diplomat i la persona prensipal ke ayudo al renasimyento Djudyo en Espanya. Este renasimyento se yamo tambyen “La edad de Oro” o “La Kombivensya”; epoka ke Djudyos i Omeyadas kombivyeron endjusto i izyeron de Andaluziya el sentro de una sivilizasyon muy espesyal. Hasday, desde ke era joven, konosiya muy byen el Ivrit, el Arabo, el Grego i el Latin, la lingua konosida solo por los papazes Kristyanos de alto nivel.

Estudyo la medisina i se izo el doktor de Abdulrahman III, syendo el primer Djudyo a tener una fonksyon tan alta. Kon su grande konosimyento, su manera de bivir, su saviduriya i su personalidad, entro a los ojos del Kalifa i se izo su konsejero fidel. Komo kedo Djudyo i ke no kijo konvertirse a la relijyon Muzulmana, no fue yamado ofisyalmente vizir, ma aktuo komo ministro del eksteryor, syendo un buen diplomat. Kuando oyo ke egziste un reynado Djudyo independente, muy aleshado i governado por Djudyos, kijo entrar en korespondensya kon el kapo de este reynado, konfirmado por los ambasadores, Mar Shaul i Mar Yosef. Hasday les entrego la letra eskrita por Menahem Ben Saruk en un buen Ivrit, ande dize: “Yo, Hasday, ijo de Yitshak, ijo de Ezra, apartenesyendo al puevlo Djudyo egzilado de Yerushalayim, en el payis Sefarad (Espanya), un servidor de mi Senyor el Rey, me aboko asta la tyerra en frente de ti, i me prosterno en direksyon de la kaza de Su Majestad, desde una tyerra aleshada.

Me alegro de vuestra serenidad, i alevanto mis manos a Dyo en el Syelo, para ke alarge vuestro reyno en Israel. Ke Dyo seya bendicho por su hen para mi. Reyes de la Tyerra ke konosen el grande poder de Abdul Rahman, trayenle regalos, adjustavos a su favor kon regalos valorozos, komo el Rey de los Frankos, el Rey de los Gebalim (Kroatya?) ke son un puevlo Alman, el Rey de Konstantinopla i los otros. Todos los regalos pasan por mis manos i yo tengo el dover de azerles regalos en repuesta. (Ibn Shaprut ke konosiya munchas linguas, resiviya los ambasadores). Ke mis mushos alaven el Dyo en el Syelo, ke asta agora espandyo ensima de mi, su buendad sin ke lo mereska.

A los ambasadores de estos reyes ke trayen regalos, demando syempre si saven alguna koza sovre muestros ermanos los Israelitas, lo ke kedo del galut (esklavaje), si oyeron lo ke seya sovre la salvasyon de la esklavitud, o si estan bivyendo en paz. (Hasday teniya merekiya para saver si las 10 trivus perdidas estan en kualkera parte komo un Estado Djudyo independente). Por fin, un shaliah (emisaryo, embiado) ke vino de Horasan (una rejyon en Iran), me disho ke ay un reynado de Djudyos ke se yama Al Khazar. Ama yo, no kreyi a estas palavras, pensando ke me estava kontando kozas para pueder tener mi favor i mi amabilidad, asta ke vinyeron ambasadores de Konstantinopla, kon regalos i una letra del rey de eyos a muestro rey; les demandi sovre este sujeto, i me respondyeron: “Es muy verdad i el nombre de este reynado es Alkhazar.

Es un viaje de kinze diyas por la mar, salyendo de Konstantinopla; ama por tyerra ay munchas nasyones entre mozotros. El nombre del rey ke reyna agora es Yosef. A vezes mos vyenen barkos de su payis i mos trayen pishkados, kueros i munchas merkansiyas de todo modo. Kolaboramos kon eyos i los onoramos. Tenemos relasyones resiprokamente entre mozotros kon ambasadas i regalos. Eyos son muy poderozos i mantyenen munchas armadas fuertes. Kuando oyi este rapor, ya me tresali, mis manos se sintyeron fuertes i mis esperansas fueron konfirmadas. Kon esto, me aboki para adorar el Dyo de los Syelos. Rogo por la salud de mi Senyor el Rey, por su famiya i su kaza.

Ke su trono seya establesido para syempre. Ke sus diyas i los de su ijo ke seyan largos en el mundo de Israel.” Letra del Rey Yozef, ijo de Aron el rey, a Hasday, ijo de Yitshak, ijo de Ezra. Ke el Kriyador lo mantenga a la kavesa de su Keila. “Deziro de enformarvos ke vuestra letra muy byen eskrita, me fue trayida por Yitshak, ijo de Eliezer. Mos izitesh orozos i estamos enkantados de vuestro entendimyento i de vuestra saviduriya. Apretaremos muestras relasyones diplomatikas ke egzistiyan antes entre muestros padres i transmeteremos esta erensya a muestros ijos. (Yosef kreyiya ke los Kuzarim teniyan, antes, relasyones diplomatikas kon los Arabos de Espanya).

Mos demandash en vuestra letra “De kual puevlo, de kuala famiya, de kuala trivu sosh”? Saven ke vinimos de Togarma, ijo de Yafet. Enkontri en el livro jenealojiko de mis papus ke Togarma teniya 10 ijos. El bohor se yamava “Ujur” (Uygur), el segundo “Tauris”, el treser “Avar”, el kuatren “Uauz” (Oguz), el sinken “Bizal”, el sejen “Tarna”, el syeten “Khazar”, el ochen “Janur”, el mueven “Bulgar” i el dyezen “Sawir” (Sabar). [Estos nombres son los fondadores mitikos de las trivus ke antes biviyan en la rejyon de la Mar Preta i la Mar Kaspiyana]. Yo vengo de la rama del syeten ijo Khazar. Tengo el testimonyo ke malgrado ke mis padres no eran muy numerozos, el Santo Bendicho les dyo la fuersa, el poder i la enerjia para venser en las gerras kontra munchas nasyones mas poderozas i mas povladas ke eyos.

Kon la ayuda del Dyo, los arondjaron i tomaron posesyon de sus tyerras. Algunos fueron metidos en lavoros forsados i sigen lavorando asta oy en diya. El territoryo ande oy bivo yo, antes apartenesiya a los Bulgaros. (A lo largo de la Volga) Muestros padres, los Kuzarim, vinyeron i kombatyeron kon eyos. Malgrado ke los Bulgaros eran mas numerozos ke los granos de arena de muestras playas, no pudyeron defendersen kontra los Kuzarim. Ansi, desharon el territoryo i se fuyeron asta el riyo Danubyo tan aleshado. (El riyo Tuna). Desde akel diya, los Bulgaros estan a lo largo del Danubyo, asta serka de Konstantinopla. Despues de esto, munchas jenerasyones pasaron asta ke un rey de nombre “Bulan” venga.

Era un ombre savyo respektando i kreyendo en el Kriador de toda su alma i korason, arondjo del payis los magos i los elilim (idolatre) i se konsolo en la solombra de sus alas. Su fama, en poko tyempo, se espandyo a los payizes estranjeros. El rey de los Romanos i de los Arabos ke oyeron avlar de el, embiyaron shagririm (ambasador) kon grandes rikezas i regalos karos para el rey i sus konsejeros, para poder konvertirlos a sus relijyones. El Rey izo trayer un Papaz Kristyano i un Kadi Muzulmano. Ama el, ke su nombre seya syempre al lado del nombre de Dyo, syendo un savyo, embiyo a bushkar i un Djudyo melumad (erudito), izo reunir los savyos de las tres relijyones i les demando de eksplikar los taanot (Argumentos) de kada una de eyas.

Kada savyo empeso a dizir ke los taanot (argumentos) de los otros son mintiras, de sorte ke no pudyeron metersen de akordo. A ver esto, el rey les dize ke retornen a sus kazas i ke vengan despues de tres diyas. El treser diya el Rey dize a los savyos de diskutir i de desidir kuala de las tres relijyones es la mijor. Empesaron a pelearsen entre eyos sin yegar a un rezultado. Por fin, el Rey demando al Papaz Kristyano: “Ke pensas de la relijyon de los Djudyos i de los Muzulmanos? Kuala de eyas es preferible?” El Papaz responde: “La relijyon de los Djudyos es mijor ke la de los Muzulmanos”.

Despues, el Rey se adreso al Kadi i le demando si la relijyon de los Djudyos es preferible a la de los Kristyanos? El Kadi respondyo: “La relijyon de los Djudyos es preferible”. Kon esto, el Rey dize: “Ansi todos los dos avesh akseptado ke la relijyon de los Djudyos es la mijor. En konsekuensya, konfiyando en la mizerikordya de Dyo i en el Poder del Todo-Poderozo, esto eskojyendo la relijyon de Israel ke es la relijyon de Avraam. Si este Dyo a ken me esto konfiyando i konsolandome en la solombra de sus alas, me ayuda, me puede dar sin pena los trezoros de oro i de plata ke me avesh prometido.

Agora puedesh retornar en paz a vuestras kazas.” A partir de este momento, el Todo Poderozo ayudo a Bulan, lo reenforso i lo konforto. Se izo Brit Mila, el i sus servidores, sus guardyas i todo su puevlo. (Las fuentes Arabas konfirman ke la famiya del rey i los nobles se izyeron Djudyos, ma no todo el puevlo.) Despues Bulan izo trayer savyos de Israel, para ke le ekspliken la Tora, para estableser los preseptos relijyozos. Desde entonses ke estamos sometidos a esta relijyon. Ke el nombre de Dyo sea bendicho i su memorya sea alavada para syempre. Desde este diya ke mis papus entraron a esta relijyon, el Dyo de Israel arebasho todos sus enemigos i sometyo todos los puevlos ke estan en muestro entorno, ke sean kristyanos, muzulmanos o paganos.

Asta oy ninguno de eyos fue kapachi de alevantar la kavesa kontra mozotros. [La letra fue eskrita al rededor del anyo 960; 9 anyos despues Yosef perdyo la gerra kontra los Rusos] Despues de Bulan, uno de sus desendyentes de nombre “Rey Ovadya”, reorganizo el reynado i establesyo konvenablemente i korektamente el Djudaizmo. Konstruizo Sinagogas i Yeshivot, izo trayer savyos ke fueron rekompensados kon oro i kon plata. (Probablamente, estos savyos vinyeron de Bagdad o de Konstantinopla). Eyos le eksplikaron la Tora, la Mishna, el Talmud i la Alaha. El rey era un verdadero servidor de Dyo. Despues de Ovadya vino su ijo Hezekya, despues de el, su ijo Manase, despues de el, Hanuka, el ermano de Ovadya, despues Yitshak, su ijo, detras de el, su ijo, Zevulun, despues su ijo Moshe, despues su ijo Nisim, despues su ijo Aaron, despues su ijo Menahem, despues su ijo Binyamin, despues su ijo, Aaron II, i enfin yo, Yosef, el ijo de Aaron II el rey, yo so rey, el ijo de un rey, desendyente de rey.

Ningun estranjero no puede suvir al trono de mis papus. El ijo vyene detras de su padre. Esto fue muestra tradisyon i la tradisyon de muestros papus, desde ke empeso sus egzistensyas. Ke sea su voluntad karinyoza, El ke dezinya todo los reyes, ke el trono de mi reynado dure toda la eternidad. Me avesh demandado sovre mi payiz i la grandura de mi imperyo. Kero enformarvos ke bivo al bodre de un riyo ke su nombre konosido es Itil o Volga. Al empesijo del riyo esta la mar Kaspiyana o el lago Hazar. El makor (manadero) del riyo esta al este, a una distansya de kuatro mezes de viaje.

A lo largo del riyo, biven munchas trivus en sivdades avyertas i fortifikadas. No olvidar ke bivo en la delta del riyo Itil o Volga i kon la ayuda del Dyo, guadro la delta del riyo i no desho los Rusos ke vyenen kon sus barkos a la mar Kaspiyana o el lago Hazar de tener kontaktos kon los Muzulmanos. De mizmo no desho los enemigos de los Muzulmanos ke vyenen por tyerras de entrar asta Derbent, la puerta de los Kaukasos ensima de la mar Kaspyana. Devo de gerreyar kon eyos, porke si les desho la mas chika okazyon, van a destruir toda la rejyon de los Muzulmnos asta tan leshos komo Bagdad.

Me avesh demandado ande bivo. Vos dire ke por la grasya del Dyo, bivo a lo largo del riyo ande estan las tres sivdades kapitales. La reyna bive en una de eyas, ande nasi yo. La sivdad es bastante emportante, konstruida de una forma redonda kon un diyametro de sinkuenta “Fersah” (Distansya ke una persona puede kaminar 5.5-6 km en una ora) (El rey biviya en una isla en medyo de la Volga). Los Djudyos, los Kristyanos i los Muzulmanos biven en la sigunda sivdad. Kon eyos ay munchos esklavos de todas las nasyones. Es una sivdad kaji de ocho “Fersah” de largo i de ancho. En la tresera biven mis ijos, mis ofisyales, mis servidores i mis serkanos.

Tambyen una sivdad redonda de tres “Fersah” de diyametro. El riyo pasa entre las murayas. Es mi rezidensya en invyerno. Despues del mez de Nisan (Avril), deshamos la sivdad i kada uno se va s su lavoro en sus kampos o vinyas. Me dizish en vuestra letra ke keriash enkontrarme. I a mi me gustariya muncho ver vuestra agradable kapachidad i la rara ermozura de vuestra saviduriya. Si me permetiyan de estar kon vozotros i kontemplar vuestra agradable kapachidad, puediash ser mi padre i yo puediya ser vuestro ijo. Ke todo mi puevlo sea governado kon vuestras rekomandasyones i ke pueda kondusir mi payiz kon vuestros diskretos konsejos. Fuente: Wikipedia