La Edukasyon

No se si avesh notado la diferensya de forma de edukasyon i de enstruksyon de eskola ke se ven entre las jenerasyones konsekutivas. Kada jenerasyon admete ke la edukasyon i la enstruksyon de eskola resividas en su epoka eran mijor de las ke se dan a las muevas jenerasyones. Kada dor tuvo una forma diferente de vistirse, una forma diferente de relasyones sosyales, un gusto diferente de arte, ke se nota lo mas en el kampo de kantikas o bayles. Avlando de dor, kreyo ke devemos de pensar a la jenerasyon de la pandemiya de Covid 19. Si esta jenerasyon va rekuperar la peryita de la enstruksyon de eskola, o estos dos anyos no van a tener dinguna emportansya en sus karieras profesional.

A parte de la diferensya de edukasyon, no olvidar ke syempre egzistyo una diferensya de pensamiento entre las jenerasyones. El dor de mi padre kon el miyo i kon el de mi ijo no tuvieron dinguna relasyon komun. Kuando se dize ke en muestro tiempo, saviyamos mijor ke los de oy, no kreyo ke siempre es muy korekto, porke oy mos ambezamos munchas kozas de los mansevos. Ma la dicha ke dize: ”Si el viejo puediya, si el mansevo saviya” es tambyen una realidad ke devemos de respektar. Komparando las jenersyones de los siglos pasados, no vemos una grande diferensya en las relasyones personal ni familyal. Tambyen no vemos diferensya en el komportamyento de los miembros de la famiya.

No egzistiya, komo oy, la libertad de los jóvenes ke se van a estudiar a otro payiz i se kedan ayi, o van a bivir i a lavorar a otro lugar. Los jóvenes de akel tyempo, apenas akavavan la eskola primarya, ya deviyan de lavorar kon sus padres o tiyos para kontinuar la profesyon de la famiya. Oy, devemos de eskapar el lise, la universita, la maestriya, el servisyo militar i empesar a lavorar seryozamente. Ken pensava antes 50 anyos ke todo se va areglar kon un teléfono de aldikera, kon una makina ke se yama “Komputadora” i ke dirije muestra vida sigun lo ke le ordonamos. La diferensya de edukasyon entre jenerasyones fue un sujeto importante por la famoza filozofa Djudiya, Hanna Arendt, ke eskrivyo un livro sovre “La kriza de la edukasyon”.

Eya dize ke los enstruktores deven de ser vistos komo los “reprezentantes del mundo” delantre de las muevas jenerasyones i la edukasyon no deve de ser vista para dar una vizyon del futuro a los jóvenes. Para eya, la edukasyon deve de ser la forma de ver el mundo tal komo es. De otra parte, el psikologo i pedagogo amerikano, Jerome Bruner, dize ke los elevos deven de ser preparados para la duda del futuro, desde las primeras klasas de la eskola, lavorando sovre las kestyones sosyalmente bivas. Al kontraryo de Hanna Arendt, Jerome Bruner ensiste ke la eskola ayude el elevo a desvelopar la kapachidad de demandar el porke, el deke, el komo, i topar la repuesta a la demanda.

De sorte ke en los dos kavzos, la konfiensya de los adultos por la manseves esta en el sentro de la edukasyon. Para Hanna Arendt, la konfiensya sinyifika ke la manseves deve de tener el konosimyento i la kapachidad para estar enfrente de los problemes del mundo, el diya ke se va azer adulto. Para Georges Bruner, la konfiensya es ke la manseves kon la edukasyon deve de partisipar a las diskusyones de estos problemes i formar una kolaborasyon. Oy la kestyon es de saver si la edukasyon i la enstruksyon deven de transferar el konosimyento, o de ambezar komo adkerir este konosimyento. El famozo milyardaryo Amerikano, Elon Musk, empeso a envestir en la edukasyon kon un program ke no se puediya imajinar asta oy.

En Los Angeles, en el kampus del “Space X”, Elon Musk i Joshua Dahn konstruyeron una eskola para dar a los elevos el mazal de ambezar el sentido i la abilidad de luchar kon los problemes, komo los de la vida. Elon Musk diziya ke “las kozas ke ambezamos a los chikos en las eskolas, no tienen un grande sentido, porke nunka se van a servir de eyas”. Por esto, Musk i Dahn se konsentraron en la edukasyon bazada sovre eksperiensas. Al empesijo, las klasas teniyan solo los ijos de Elan Musk i los ijos de los enjenyores de “SpaceX”. Oy la eskola tiene mas de 5,500 elevos aktivos i miles ke están asperando en la lista de aspera.

Si este program va tener grande sukseso, kreyemos ke todo los payizes van a kerer adaptarsen al mizmo sistem. Fuente: Prof. Philippe Forey