Doktoresa en la Antikuedad

Un diya en el siglo 4 A.E.K. (Antes de la Era Komun), una mujer de Atena yamada Agnodisya fue trayida delantre del Aeropaj formado de ombres yenos de birra (kolera) i ampeso a desvistirse kon grande trankilidad. El Aeropaj era el konsilyo de los vyejos ke governavan la sivdad de Atena. Es ke Agnodisya estava vistida komo ombre i la akuzaron porke, al pareser, estava sedusyendo las mujeres de Atena. Desvistyendose, eya amostro ke no era ombre i ansina empeso su istorya de doktoresa. En realidad esta istorya de Agnodisya es, o no es verdad, no se save muy byen, porke los akademikos no se metyeron de akordo sovre esta istorya.

Lo ke es verdad, es ke eya se konose komo la primera doktoresa i jinekologa en la istorya eskrita. Desde ke era chika, aviya remarkado la grande mortalidad de los bebés i de las madres, myentres ke estan dando luz, i esto la izo ke se interese en la medisina en jeneral i en la jinekolojiya en partikular. Ama las leyes de Atena de akeya epoka no permetiyan a las mujeres de mesklarsen de la medisina i mas i mas de la jinekolojiya. Koza ke era kastigada kon la pena de muerte. Lo ke es satiriko, es ke de syempre fueron las mujeres ke fueron komadres, o paryentes ke ayudaron al nasimyento del bebé, tenyendo miles de anyos de eksperiensa.

Ama en Atena los ombres, un poko selozos de ver las mujeres tan kapachis, en este siglo, izyeron esta ley ke no dava a nada, bazandosen sovre las ensenyansas de Hipokrates, ke se konsidera komo el padre de la medisina, i ke permetiyan solo a los ombres de pratikar este ofisyo. Es ansi ke las komadres no pudyeron lavorar en este siglo, de espanto de la pena de muerte. La mankura de komadres izo ke munchos partos se terminaron kon la muerte o del bebé, o de la madre. I munchas mujeres prenyadas, seya ke eran timidas o seya por el onor de la famiya, no keriyan ser konsultadas por un ombre estranjero, myentres el parto.

Es ansi ke Agnodisya ke se metyo en la kavesa de evitar la muerte, de salvar las mujeres prenyadas, se korto sus kaveyos, se vistyo de ombre i se fue a Aleksandria en Ejipto, para estudyar la medisina kon el doktor Hiyerofil de Kalsedonya (Kadıköy - Haydarpaşa) (335-280 A.E.K). Hierofil era un disipulo de Hipokrat i el fundador de la eskola de medesina de Aleksandria, tanbyen se konsidera komo el padre de la anatomiya i fue al pareser el primer ke empeso a tomar en konsiderasyon el pulso komo egzamen medikal i el primer ke deskuvryo los overes. Agnodisya, kedando komo ombre i despues ke se ambezo munchas kozas sovre la la medisina i la jinekolojiya, torno a Atena.

Un diya en la kaye, oyo los gritos de una mujer ke estava paryendo. Entro a la kaza de esta mujer para ayudarla. Las vizinas vyendo un ombre ke kere entrar a la kamareta de la prenyada, empesaron a maltratarla. Eya pishin se desvistyo i amostro lo nesesaryo para ke veygan ke era mujer. Ansi fue akseptada i salvo la mujer de la muerte. I ansi se oyo en toda la sivdad de Atena, la fama de un ombre ke esta lavorando komo doktor i komadre, i ke toda las mujeres, prenyadas o no, keren su ayudo. Esto izo dudar los ombres de Atena, ke un seduktor esta entrando a las kazas para sedusir la espoza, la ermana o la ija ke se estan azyendo de hazina para ser kontroladas por este ombre, i es por esto ke la trayeron delantre del Aeropaj i ke se empeso a dezvistirse para amostrar ke era mujer.

La kulpa de ser mujer i doktoresa era la pena de muerte. Los ombres birrozos del juri la kondanaron, dandole la pena de muerte i fiksaron una data para la egzekusyon. Las mujeres de Atena protestaron tan fuerte a esta desizyon, dizyendo ke preferiyan darsen la muerte i no ser vistas deznudas por doktores ombres, ke los ombres trokaron la ley i permetyeron a las mujeres de estudyar la medisina a kondisyon de kurar solo las mujeres i no los ombres. Agnodisya resivyo la fama de ser la primera doktoresa i la primera mujer jinekologa, i kon esto se izo el sembol de igualdad kon ombres, i de la kreatividad de las mujeres.

Komo se disho mas ariva, no se save muy byen si esta istorya de Agnodisya es verdad o no. La sola vez ke se ve su nombre eskrito, es en el livro de Caius Julius Hyginus (64A.E.K – 17E.K) (Antes de la Era Komun – Era Komun) “Fabulas i Astronomiya Poetika”. Un livro yeno de istoryas, algunas mitolojikas, otras paresyendo verdad. Fabula kere dizir istorya. Esta istorya, mito o no, mos ambeza ke la mujer aspira a kontrolar su proprio puerpo, la voluntad de la oprimida para luchar kontra las menasas de la otoridad, la importansya de ser un grupo para luchar. A saver ke si las mujeres no se metiyan todas de akordo, las leyes de la sivdad no se ivan a trokar.

Es por esto ke Agnodisya es una fuente de inspirasyon para las mujeres de oy. Fuente: N. Saldarriaga