Sovre el Esperanto

Verso la fin de los anyos 1800, la sivdad de Bialystok ke aparteniya a los Estados de Polonya, Rusya, Prusya i oy de muevo a Polonya, era un sentro kozmopolito ande biviyan Polakos, Rusos, Almanes i munchos Djudyos ke avlavan el Yidish, formando el 75% de la povlasyon entera. Estos Djudyos eran los ke dominavan la endustriya de tekstil. En 1921, el 88% de los komersantes eran Djudyos i 89% de las fabrikas aparteniyan a los Djudyos. El 15 de Desembre del anyo 1859, nasyo en Bialystok, Ludwik Lejzer Zamenhof, el famozo Djudyo ke iva inventar la lingua artifisyal ke la yamó Esperanto. En kaza el avlava kon sus padres el Yidish, el Ruso i el Polako.

De su padre ke era maestro de eskola, se ambezo el Alman, el Fransez i el Ivrit. En la eskola se ambezo las linguas klasikas, el Latin, el Grego, el Arameo. Se entereso tambyen al Italyano, al Espanyol i al Lituanyano. El Inglez se lo ambezo muncho mas tadre. A los 10 anyos, eskrivyo una pyesa de tiyatro yamada “La Torre de Babel o la Trajediya de Bialystok”. Esta idea de eskrivir una pyesa de tiyatro le vino despues de ver los konfliktos ke egzistiyan entre las nasyones diversas de Bialystok i ke no teniyan una lingua komun para entendersen. En 1878, kuando teniya 19 anyos, eskrivyo la primera versyon del Esperanto i la yamó “Lingua Universala”.

Esta primera versyon fue kemada por su padre ke keriya ke Ludwik dé mas atansyon a sus estudyos, al lugar de eskrivir livros, i es ansi ke estudyo la medisina en Moskova i en Varshova i se izo un buen oftalmologo. Deviya de pasar 10 anyos para tornar de muevo a su livro. El primer livro del Esperanto salyo en Varshova el 14 de Julyo 1887. Ludwik Zamenhof firmo su livro debasho del nombre “Doktor Esperanto”. En el livro estavan las 165 reglas de la gramer i las 917 raizes de las palavras de linguas de syertos payizes de Evropa, komo las linguas romanas, germanikas i slavas. (Rusya, Ukrayna, Bulgarya, Serbya, Makedonya, Polonya, Slovakya, Chekya, Kroatya, Bosniya, Slovenya).

La idea era de inventar una lingua la mas fasil ke seya i ke se podriya ambezar en el tyempo mas kurto. Al pareser ke Leon Tolstoy se ambezo el espereanto en muy poko tyempo. Uvo mizmo un kongreso enternasyonal del Esperanto en el anyo 1911 en Anvers. Todo esto era para ke una lingua komun seya el instrumento de una pas mondiyal entre diferentes kulturas. Entretanto, Zamenhof estava muy preokupado kon la kestyon Djudia, es dizir kon el Antisemitizmo i los pogromes ke se aziyan kontra los Djudyos. Era aktivo en el movimyento sionisto del “Hibbat Tsiyon”. Ama publiko una deklarasyon afirmando ke el movimyento siyonisto ne puediya rezolver los problemes del puevlo Djudyo: “Esto konvensido ke kada tipo de nasyonalizmo no puede dar a la umanidad mas ke una grande malor”.

Kon el tyempo, desvelopo una filozofiya personal ke yamó: “Homanarizmo” ke kere dizir “Umanitarizmo”. Una filozofiya bazada sovre la saviduriya del famozo Savyo Djudyo del primer siglo A.E.K. (Antes de la Era Komun) “Hillel”. Kon esta filozofiya, Zamenhof intentava de reformar el Djudaizmo para ke los Djudyos ne seyan viktimas del antisemitizmo. Ludwik Zamenhof muere en Varshova el 14 Avril 1917. Su ija, Lidya, ke se izo profesora para ensenyar el Esperanto, se konvertyo a la relijion Bahai, bivyo en los Estados Unidos, ama en 1938 tuvo de tornar a Polonya porke los Amerikanos no kijyeron alargar su viza i en Polonya fue ovligada de kedarse en el geto de Varshovi i muryo en Treblinka.

El vokabularyo del Esperanto se kompoza del Inglez, Fransez, Italyano, Alman, Grego, Latin, Polako, Ruso i del Yidish. Estas eran las linguas ke Zamenhof konosiya muy byen. Aun ke tengan una paryentes kon las linguas de Evropa, la gramatika i la prononsyasyon paresen muncho al Turko. Es dizir ke en el Esperanto no egziste el jenero, el maskulino o el feminino. “Meza” no es “la meza”, es solo “meza”. “Ojo” no es “el ojo”, es solo “ojo”. En la prononsyasyon ke es kompletamente fonetika, todas las letras se pronunsyan syempre de la mizma manera i no trokan de prononsyasyon delantre de otras letras. Entre 1907 i 1917, data ke el muryo, Zamenhof fue 14 vezes kandidado al premyo Nobel, i la Asosiasyon Universal del Esperanto fue kandidado por mas de 100 vezes.

Aunke nunka se dyo este premyo, oy se dize ke ay mas de 2 milyones de djente ke avlan esta lingua. Despues de la Primera Gerra Mondiyal se formo “La Sosyetad de Nasyones” para evitar los konfliktos entre Nasyones. El delegado de Iran, propozo ke el Esperanto seya la lingua ofisyal de la Asamblea. Solo Fransya izo veto de espanto ke el fransez iva perder su importansya, su influensya i su prestijyo en la diplomasiya. No permityeron la ensenyansya del Esperanto en las universidades, dizyendo ke era un djugo de los komunistos. En la Unyon Sovyetika disheron ke esta lingua es djugo de los espiones. En la Almanya Nazi, disheron ke esto es un djugo de los Djudyos ke keren konkistar el mundo entero.

Es despues de 1954 ke La Unesco metyo en su program el Esperanto. MULTAJ DANKOJ = Mersi muncho