Sovre Yerushalayim

Las investigasyones ke se izyeron en Yerushalayim, mos amostraron ke esta sivdad al empesijo era muy chika, ande se kreye ke biviyan puede ser algunos 500 o 700 personas entre los anyos 1700 i 1000 (A.E.K) (Antes de la Era Komun) dize el Profesor Hillel Geva de la Universita Hebraika de Yerushalayim. En la epoka del Reynado del Rey David i Shelomo, esta povlasyon devriya pujar asta 2000, pensa el Prof. Geva. Otros profesores pensan ke la povlasyon puedriya ser komo 4500 o 5000 en la mizma epoka. Por el tyempo de los Hashmonaim, (Anyos 150 i 50 A.E.K.) (Antes de la Era Komun), el Prof. Geva pensa ke la povlasyon suvyo a 8000.

Kon la dinastiya de Herodes (entre 50 A.E.K. i 70 E.K.) (50 Antes de la Era Komun i 70 de la Era Komun) lo maksimom fue komo 20,000. Otros profesores estimaron asta 75,000 personas. Kon la yegada del kristiyanizmo, Yerushalayim se izo una sivdad kozmopolita ande kristyanos, djudyos i mas djente de otras umas komo Armenios, Gurdjis o Koptos, ke kijyeron murir en la Tyerra Santa o azer una pelegrinasyon, incheron la sivdad. Despues del evenemento de Bar Kohba i ke los Djudyos no tuvyeron la permisyon de bivir en Yerushalayim, kon el kampamento de los militares Romanos, la lingua avlada aya fue en jeneral el Grego; porke se kreye ke lo mas de los soldados del kampamento eran nativos de Yerushalayim ke avlavan el grego.

Savemos ke kuando el papaz aziya orasyon en grego, la orasyon pishin se traduziya al Arameo. Esto mos amostra ke el Arameo en esta epoka fue dainda la lingua ke se avlava en esta sivdad. En el siglo 4, kon el Emperador Konstantino ke dyo la libertad a los kristiyanos i kon el Emperador Theodosyos ke desidyo de azer la relijyon kristiyana, la relijyon ofisyal del Imperyo Romano, munchos Djudyos empesaron a konvertirsen al kristiyanizmo para pueder sovrebivir trankilamente en Yerushalayim. Kon la invazyon de los Persos en el siglo 7 de la E.K. (Era Komun), kontando las viktimas muertas i los ke se izyeron prizoneros a los Persos, se djuzga komo 50,000 personas ke biviyan en Yerushalayim.

Despues ke el Imperyo Romano aksepto la relijyon Kristiyana komo relijyon del Estado, munchos Latinos se hueron a Yerushalayim para azer la pelegrinasyon. Algunos se kedaron, i los de mas tornaron a sus payizes. Munchos de eyos eran de la aristokrasiya o serkanos del emperador ke estava reynando. Algunos de estos pelegrinos se hueron a bivir tambyen a Betlehem, ande se dize ke nasyo Yeoshua o Yeshu i ke antes aziya parte de Yerushalayim. Otros kijyeron bivir en el Monte de las Azetunas, ande formaron munchos monasteryos. Komo los Latinos, munchos Romanos ke avlavan el Grego, syendo sus propriya lingua maternal porke biviyan en Turkiya de oy o en Konstantinopla, se hueron a Yerushalayim para azer la pelegrinasyon.

Entre estos Anadollis, dos reynas tuvyeron grande onor en Yerushalayim. Una de estas reynas era Helena, la madre de Konstantino, ke izo el chikitiko puevlo de Bizansyo la kapital del Imperyo Romano. Helena yego a Yerushalayim en el anyo 327 de la E.K. (Era Komun) i se dize ke topo, komo un milagro, la Kruz ande Yeshu (Yeoshua) fue krusifikado antes 300 anyos. Al pareser ke esta kruz tan istorika esta en las fondasyones de la kolumna ke yamamos en Turko “Çemberlitaş”, el primer monumento erijido por el Emperador Konstantino, ande teniya su estatua en forma de Apolon ensima de esta kolumna i ke kayo en el siglo 10, despues de una furtuna muy fuerte.

Komo afito munchos fuegos aldoredor de la plaza ke yamamos oy “Beyazıt”, metyeron aniyos de fyerro en la kolumna para ke no se derroke. La otra reyna fue Evdoksiya, la mujer del Emperador Theodosyo II, ke era el ijo de Arkadyo. Para entender mijor, Arkadyo era el ijo del Emperador Theodosyo I ke divizo el Imperyo Romano en dos. Teniya dos ijos. Onoryo se kedo en Roma i se izo el emperador del Imperyo Romano del Oeste. Arkadyo se kedo en Konstantinopla i se izo el emperador del Imperyo Romano del Este, ke muncho despues van a yamar este imperyo “Bizantino”. Evdoksiya, una ijika muy ermoza, era una damma de onor ke vino de Atina.

Era muy kulta porke tuvo una edukasyon i enstruksyon akademika, plazyo muncho a Pulkeriya, (Pulcherie) la ermana grande de Theodosyo II ke desidyo de kazar su ermano kon esta chika. Komo fue akuzada de adulteriya se fue a Yerushalayim i se kedo aya. En la istorya de muestros diyas, la madre del Prens Philip o la kosfuegra de la Reyna Elizabeth II, Alice, ke se izo monha (Mujer Papaz) (Komo en muestra kultura no tenemos mujer papaz, empleyi la palavra espanyola) esta enterrada en Yerushalayim. A parte de Konstantinopla, i pelegrinos de Kapadokya, el sentro de Turkiya, de Konya, de los Pontos, rejyon de la Mar Preta, de Galatya, rejyon de Ankara, de Sezarea, rejyon de Kayseri, de Armenya, en el este de Turkiya, incheron Yerushalayim.

Oy, en Yerushalayim egziste una maale ke se yama “La Maale de los Armenyos” i se kreye ke desde syempre, los Armenyos bivyeron en esta maale. Una otra maale era la maale de los Gurdjis. Los Gurdjis avlavan el Grego ma aziyan la orasyon en Gurdji. Desde ke el Emperador Hadriano dyo el orden de no deshar a los Djudyos de entrar a Yerushalayim despues del anyo 70, no tenemos muncha seguridad ke uvo una maale de Djudyos. Ama savemos ke en las tres fyestas ke son Pesah, Shavuot i Sukot, el Djudyo deviya de suvir a Yerushalayim para azer la pelegrinasyon. Esto mos aze pensar ke syempre uvo Djudyos ke fueron a Yerushalayim por estas fyestas i mizmo ke se fueron aya para komemorar el diya de Tisha be Av.

Yene savemos ke una chika komunidad Djudiya egzistyo en el Monte de Sion malgrado la prohibisyon. Kuando vino el Emperador Julyan al poder, el emperador ke lo yamaron el “Apostato” porke no aksepto el Kriztiyanizmo i kijo tornar al paganizmo, permetyo a los Djudyos de fraguar de muevo el Bet Ha Mikdash. Ama muryo antes ke empesen los lavoros. Kuando la Reyna Evdoksiya permetyo a los Djudyos de entrar yene a Yerushalayim, mas de 100,000 Djudyos vinyeron por la fyesta de Sukot del anyo 440 de la E.K. (Era Komun). En el anyo 640, kuando los Sasanides (Persos) tomaron Yerushalayim, savemos ke munchos Djudyos ayudaron a los Sasanides en esta gerra.

La epoka de las kruzadas i de los Seldjukides merese un otro artikolo. Kon eyos empeso el reynado de los Muzulmanes i kon los Otomanos, duro asta la fin de la Primera Gerra Mondiyal. En 1948 la mitad de Yerushalayim aziya parte de Israel. Oy Yerushalayim es la unika kapital de este payiz. Fuente: Leah Di Segni, Yoram Tsafrir, Hershel Shanks