La Mas Vyeja Kehila de Estanbol

Muy poka djente se entereso a avlar sovre la kehila mas vyeja ke egzistyo en Estanbol. Komo no tenemos alguna prova konkreta de su egzistensya, los ke son enteresados no dyeron muncha emportansya a lo ke disheron algunos istoryadores bizantinos. La importansya se dyo lo mas a la iglesya dedikada a la “Madre de Dio” ke fue fraguada en el merkado de kovre. Los ke son de mi edad, saven muy byen ke el merkado de kovre en Estanbol estava detras del grande merkado kuvyerto ke se yama “KAPALI ÇARŞI” i delantre del merkado de los livros vyejos ke se yama “Sahaflar Çarşısı”. Oy este merkado ya dezaparesyo, ama era una atraksyon de oyir la boz del sonido ke aziya el martiyo aharvando el kovre i azyendo del kovre kozas artizanal muy espesyal.

El merkado de kovre ke avlavan los bizantinos estava djusto entre la grande iglesya yamada “Aya Sofia” “La saviduriya sakrada” ke oy la konosemos komo la Meshkita de Ayasofya, un templo enorme konstruido en el siglo 6 de la E.K. (Era Komun), i el parke de las Rozas ke se konose oy sovre el nombre de “Gülhane Parkı”. La mas vyeja eskrita sovre esta Sinagoga es de la parte de Teofanes, el istoryador ke bivyo entre los anyos 860-917 de la E.K. (Era Komun). Teofanes mos dize ke la iglesya fue fraguada por Pulkerria (Pulchérie), ermana de Theodosyos II en la data de 449-450 de la E.K. (Era Komun) en el mizmo lugar ande estava la Sinagoga del merkado de kovre ande biviyan los Evreos (los Djudyos).

No mos da muncha konfiyensa este Teofanes porke en una otra eskrita, repeta la mizma koza dizyendo ke la iglezya fue fraguada en el tyempo del Emperador Justin II ke reyno entre los anyos 565-578 E.K. (Era Komun). Es ke en el livro “La Patria” eskrito en el siglo 10, esta eskrito la mizma koza dizyendo ke la iglezya de la “Madre de Dio” fue fraguada en el merkado de kovre ande moravan Evreos desde el tyempo de Konstantino el Magno i mizmo antes de el. Es dizir mizmo antes del anyo 330 de la E.K. (Era Komun) ke Konstantino izo de Bizantyon, ke era un kazaliko, la grande kapital de su imperyo i ke se yamo Konstantinopla.

Un kroniko del siglo 12 eskrito por un syerto Yohana Zonaras, dize ke la sinagoga del merkado de kovre fue fraguada de una forma illegal. Al pareser ke los Djudyos desidyeron de dar a komer a Honoratus, el prefekto de Konstantinopla, para fraguar una sinagoga en el merkado de kovre i tuvyeron su aprobasyon, savyendo ke Honoratus no era kristyano i komo pagano, se kargo mizmo de los gastes de la konstruksyon. Esto izo ke la komunidad kristyana protesto a la egzistensya de una sinagoga en esta zona i danyaron el edifisyo, kemandola enteramente. El prefekto Honoratus desidyo de kastigar los ke kavzaron el fuego, dandoles el orden de fraguar de muevo la sinagoga sigun la ley de Theodosyos, ke akseptava a protejar los Djudyos i advertizo el Emperador Theodosyos ke estava entonses en Milano, de todo esto ke paso en Konstantinopla.

Kuando Ambrosius, un savyo kristyano konsiderado komo uno de los padres de esta relijyon i ke biviya en Milano, tuvo haber de esto todo, disho al Emperador: “Porke razon, tu Emperador, estas ensultando El ke te izo rey de entre los ombres del puevlo, El ke te metyo la korona sovre tu kavesa, akseptando ke los kristyanos fraguen i ke pagen los gastes de una sinagoga en medyo de la sivdad ande el kristo esta adorado.” Kon esta kritika Theodosyos troko su komportamyento i desidyo ke las sinagogas devriyan de ser konstruidas afuera de la sivdad. Segun estas eksplikasyones, oy konsideramos ke esta sinagoga estava djusto ande esta la meshkita de “Arpa Emini Lala Hayrettin Paşa”

Fuente - Alexander Panayotov (United Kingdom) - 2019