El Ojo Malo

Todos savemos lo ke es el “ojo mavi” ke yamamos “Nazarlik”. Un pedaso de vidro echo komo una karucha, en medio un ojo de kolor mavi mirándote en la kara i ke se dize ke te va protejar del ojo malo. En Antiokya (Antakya) tenemos un muzeo muy riko de mozaikos. Uno de estos mozaikos ke se yama «KAİCY”, mos amostra el “Ojo Malo” KAICY = I A VOZOTROS Eskrivyendo “i a vozotros” el mozaiko kere dizir: ”A los ke te keren buendad, ke les afite buendad; i a los ke te keren maldad, ke les afite maldad”. El mesaj de este mozaiko es “Lo ke dezeas para mi, lo dezeo para ti”.

Un mesaj de luchar kontra la maldad i aresentar en la buendad. Este tipo de mozaikos se enkontravan delantre de las kazas en la epoka romana i se dize ke serviya a azer aleshar el ojo malo i la enerjiya mala de estas kazas. El ojo malo es una mirada ke se kreye ke aze maldad a una persona o a una koza. Esta maldad puede vinir en forma de desgrasya, de aksidente, de hazinura i mizmo en forma de muerte. El akademiko Alan Dundes paso anyos a estudiar el fenómeno del ojo malo i dize ke esto es una kreyensa folklorika en el mundo Indo-Evropeo i en el mundo Semitiko, komo lo vemos en los tekstos de los Sumeryos.

Antes de bever, tokar los vazos de vino uno al otro, dizir “Ke Bivas” kuando uno sarnuda, son restos de este tipo de kreyensa ke mos kedo de estas epokas antiguas. Alan Dundes, en su lavoro, se sirvyo de la antropolojiya, de la oftalmolojiya, de la psikiyatriya, de la sosyolojiya i de los estudyos relijyozos. El akademiko Needham dize ke el ojo malo es una figura sentetika ke vyene del selo, de kerer i no pueder, de la nosyon del mal echizero, de dezear, i del espanto. Las manos ke se enkontraron en la grota de la isla de Sulawesi en Endonezya, ke son viejas de mas de 40,000 anyos, mos dan una idea de la figura sembolika de proteksyon, de azer aleshar el danyo, la hazinura o kualker otro peligro.

El ojo malo ke es una forma de maldisyon echizera, tiene sus raises en la superstisyon i en el pensamiento enkantador. Kuando no se puede topar la razón de kualker danyo, o hazinura, o un mal de la natura, desde syempre el umano topo la solusyon en el mal de ojo. Desde syempre ke se dyo esta repuesta a la kestyon “Deke las kozas malas afitan a la buena djente?: “Del ojo malo”. Se dize ke los ojos forman la entrada a la alma de una persona porke tienen un poder espesyal. Fuyir la mirada, se dize ke denunsya el mintirozo. Una mirada fiksa, puede ser enterpretada ke vyene de karinyo o de menasa dependiendo de las sirkonstansyas i tambyen demostra un poder de superioridad.

La mirada eksplika la emosyon, el amor, el aborreser, el desgusto, el enfasyo, el ensulto, la kerensya i la sopreza. Se kreye ke el shashuto traye mala suerte. De mismo por la persona ke tyene ojos de kolor diferente. En munchos payizes, alavar un bebe no plaze a los paryentes, porke i esto puede trayer la mala suerte. En Turkiya meter un ojiko mavi kon epengl nuris en las fashas del bebe es muy frekuente. Después de alavar un bebe, se dize de eskupir en la kara del bebe tres vezes dizyendo “pu, pu, pu”. En Gresya, mismo alavando la ermozura de una mujer, deves de azer la mizma koza.

Una proteksyon kontra el mal de ojo a vezes fue el ajo ke se enkolgava en una parte de la kaza. Oy en diya ay un montón de djoyas ke uzan las mujeres kon piedras presyozas i ke paresen al ojo mavi. No kreyash ke la superstisyon del ojo malo se perdió oy en el mundo. Por munchos akademikos, esta superstisyon afekta milyones de djente, sea en la rejyon del Mediterraneo, sea en la Amerika latina. En İvrit dizimos “Ayin ha Ra”. Una proteksyon del Ayin ha ra es lo ke yamamos “hamsa” ke es la mano kon los sinko dedos i ke sierve a azer aleshar el “Mal de Ojo”.

Sueto a todos de estar leshos de ora mala i de ojo malo. Fuente: Benjamin Radford i C. McKelvie