Diwali

La fin de semana del mez de Oktobre kontyene fyestas ke no son muy konosidas en muestro payis. Sea los Kristyanos, sea los Hindus, selebran fyestas ke se asemejan ma ke tyenen raizes diferentes i ke a la fin yegan a la mizma selebrasyon, selebrar el trokamyento de ona, selebrar la viktorya de la lucha de la luz kontra la eskuridad, de la saviduriya kontra la inyoransa, de lo Bueno kontra el Mal. Diwali es una fyesta Hindu ke dura kaji una semana i se kree ke es la mas importante fyesta ke vyene mas o menos en la mizma ona, porke i los Hindus empleyan el kalandaryo lunar, o mijor dicho el kalandaryo “lunasolar”, komo mozotros i adjustan un mez kada 32 o 33 mezes, aserkandosen del kalandaryo solar, ansi sinkronizan los dos kalandaryos.

Porke el anyo lunar tyene 354 diyas i el anyo solar tyene 365 diyas, la diferensya de los 11 diyas se arreglan en 2 anyos i medio. En realidad, India syendo kaji un kontinente, en diferentes rejyones, tyenen diferentes kostumbres de kalandaryo, de selebrasyon, de lingua, diferentes uzos i tradisyones. Ama la mayoriya akseptan lo ke esta dicho. Diwali es en mizmo tyempo una fyesta de anyo muevo komo muestro Roshashana, una fyesta de luzes komo muestra Hanuka. Lo enteresante es ke estas fyestas vyenen syempre en la mizma epoka del anyo. Una fyesta asemejante es la fyesta de Santa Lucia, la viktorya de la lucha de la luz sovre la eskuridad.

Esta fyesta se selebra lo mas en Italya, en los payizes nordikos komo la Sueda, la Finlandya, la Norvejya, la Danimarka, en Espanya, i en syertos payizes de la Amerika Latina. La leyenda dize ke una chika de nombre Lusi ayudo a los kristyanos sekretos, trayendoles komida kon sus manos i tenyendo la kandela ensima su kavesa. De aya vino tambyen el nombre de la fyesta komo fyesta de las luzes. La fyesta tyene relasyon i kon los martires kristyanos i kon las almas de los ke muryeron. I mozotros, entre Roshashana i Yom Kipur, vamos a vijitar los keridos ke pasaron al otro mundo mas o menos en la mizma epoka.

La mizma tradisyon egziste en los Kristyanos ke lo yaman el Diya de los Santos. En inglez All Saints, en fransez Toussaints. Diya de komemorasyon de los keridos muertos. Este diya se selebra el 31 de Oktobre i el mizmo diya en la Amerika selebran lo ke se yama el “Halloween” o fyesta de “Las Djadiyas” ke es i esto diya de komemorasyon de los martires o muertos. La raiz se dize ke vyiene de los Celtos o Galatos, ke tambyen dyeron sus nombres a una maale en Estanbol, la famoza Galata, raiz ke se baza sovre la kosecha (Hasat). La tradisyon kere ke en la Amerika los ijikos, el fener en la mano, pasen de kaza a kaza demandando karamelas o a vezes paras.

Aze anyos, en la maale de la Kula, las kreaturas djudiyas pasavan, el fener en la mano, kantando “ashiya mi koles, syen paras de koles”. Esta tradisyon de tener fener i pasar por kazas empeso en el siglo 15, ande los ijikos desfilavan de kaza a kaza para komer las dulsuryas ke se aziyan para las almas de los muertos i tambyen arekojer groshes para ser pagados por las orasyones ke les aziyan. En la Amerika, esta fyesta tuvo la enfluensya de las novelas komo “Frankestein”, “Drakula” la “Momiya”, kon las vestimyentas de vampir, los artikolos de sementeryo, tombas, muertos i “los mijores de mozotros” o los “sidimes”. Yene en la Amerika, la kostumbre en esta fyesta es de komer mansana untada en la myel, tal komo lo azemos en Roshashana, komer semiyas tostadas de kalavasa, koza ke no mankava en muestras kazas, asentados serka de la soba para pasar el tyempo.

Eskrivyendo “Fyesta de las Djadiyas”, ay ke adjustar el folklor de los Slavos ke se trata de “Dzady” ke kere dizir los Padres, los ansestros, la komunyon de los bivos kon los muertos. La palavra “Dzady” vyene de “Dede” ke tambyen en la lingua protoslava, kere dizir “Padre de la madre o del padre”, ombre vyejo kon una pozisyon onoravle en la famiya. Komo lo vemos, palavras ke kreyemos orijinales en una nasyon, ya se enkontran en linguas de otras nasyones ke no tyenen dingun dar i aver entre eyos. Ansi komo las palavras, i las fiyestas se asemejan muncho entre payizes ke no tienen dinguna relasyon jeografika entre eyos.

Oguramos ke la Amistad i la Ermandad en todo el mundo seya para syempre. Fuente: Wikipedia