El Pino de Fin de Anyo

En munchos payizes kristyanos selebran la fyesta de Noel en enkolgando regalikos ensima de un arvoliko de pino. La leyenda dize ke el Papa Noel o el San Nikola ayudava las novyas ke no teniyan el poder de prokurar una dota, o echava regalikos por la chimeneya del tejado ke kayiyan aryento de las kalsas ke enkolgavan en la chimeneya de la kamareta para ke se seken. Kon el tyempo, al lugar de enkolgar kalsas, los paryentes enkolgaron los ragalikos en un arvoliko de pino. Esto se izo de moda en munchos payizes de tener un arvoliko de pino en las kazas por la fin del anyo. Savemos ke los arvoles de pino fueron syempre un simbolo de vida larga, porke no deshan kayer las ojas ke son komo algujas i kedan syempre vedre.

Solo los pinos hazinos tyenen las ojas de kolor maron. En jeneral los puevlos del medyo oriente adoravan el sol kuando la noche era la mas larga, lo ke korresponde a los dalkavos diyas del mez de Desembre. Aze mas de 2500 anyos, en China, un ombre ke se yamava Zungfong topo, en mezurando las solombras, ke el diya el mas kurto del anyo vyene en estos diyas i desde entonses los Chinos selebran estos diyas del 21, 22, o 23 del mez de Desembre komo fyesta de Dongzi. Una fyesta muy paresida egziste en los payizes komo Iran, Azerbaydjan, Afganistan yamada “La noche Yalda”. Desde Daryo, el famozo rey Persano ke bivyo aze mas de 2500 anyos, la djente de estos payizes selebran la yegada del invyerno el 21 del mez de Desembre.

En otra parte del mundo, en la Amerika del Norte, los Indyos, los orijinaryos de esta tyerra yamados ansi porke Kristof Kolomb kreyiya ke estava en Indiya kuando vido estas personas ke no paresiyan a los Evropeos, selebravan este mizmo diya la yegada del invyerno tal komo los Chinos i los Persos, una selebrasyon ke se yamava “Soyal”. En una tomba topada por la profesora Maria Dolores de la Universita de Malaga, en Assuan, Ejipto, el sol del diya 21 de Desembre kayia djusto ensima de la estatua del governador ke bivyo aze serka de 4000 anyos. Esto kere dizir ke i en Ejipto markavan este diya del 21 de Desembre komo un diya emportante ke era la entrada al invyerno.

En todas estas selebrasyones, el dekor mas emportante era un arvole en jeneral de pino, dando lugar a la fyesta de Noel kaji 700 anyos despues ke nasyo Yeoshua (Yeshu). Este arvole es la prova la mas emportante de la tradisyon de inogurar el diya del 21 de Desembre. En los Estados Unidos algunos Djudyos adornan el arvole de fin de anyo kon Magen David i kon luzes al lugar de djugetikos, yamandolo “Arvole de Hanuka”, savyendo ke Hanuka vyene munchas vezes en los mizmos diyas. Una tradisyon Turka muy antigua es lo ke yamamos el “Narduğan” o “Nardoğan”. La famoza Sumerologa, Muazzez İlmiye Çiğ, mos konta ke segun la fey ke teniyan los Turkos de Asya Santral antes de tomar la relijyon Muzulmana, kreyiyan ke djusto en el sentro del mundo aviya un grande arvole de pino ke era konsiderado komo el arvole de vida.

El simbolo del arvole de vida se ve en munchos tapetes, kilimes o broderias turkas. La gerra entre el diya i la noche se akava el 21 o el 22 de Desembre i la viktorya es del diya ke empesa a alargarse. La selebrasyon se aze debasho de un arvole de pino ande komiyan i baylavan. Esta selebrasyon se yama la fyesta de “Nardoğan”. Nar kere dizir Sol i Doğan kere dizir Nasimyento. Enkolgavan kozikas al arvole de pino para rengrasyar al Dyo ke esta azyendo alargar los diyas. Este tipo de pino krese al pareser solo en Asya Santral i esta tradisyon se dize ke paso a los Kristiyanos komo arvole de Noel, a traves de los Hunos ke eran una tribu Turka ke entro asta Italya kon el famozo Atilla en el anyo 451.

Asegun se alargan los diyas, oguramos a todos sanedad amor i parnasa buena.