El Monte Moriah

La istorya jeneral es yena de evenimientos ande los Djudyos a vezes pudyeron suvir a este monte del Bet aMikdash, i a vezes no les permetyeron de estar aya. Despues de la sigunda destruksyon del Templo asta la revolusyon de Bar Kohba, no tenemos dinguna restriksyon. Ama kon esta revolusyon del anyo 135 de la E.K. (Era Komun), el emperador Hadriyano desidyo de defender la entrada a este lugar. Por esto los Djudyos suvyeron al monte de las Azitunas de ande se ve muy byen el monte Moriah i las ruinas del Templo. El emperador Konstantino ke transfero la kapital del imperyo Romano de la sivdad de Roma en Italya, a Bizantiyon ke era el primer nombre de muestra sivdad de Estanbol en el siglo 4, permityo a los Djudyos de entrar al monte Moriah solo un diya al anyo, el diya de Tisha be Av.

El sovrino de Konstantino, el emperador Julian, ke se konose komo el Apostato (el ke nyego el kristyanizmo) en el anyo 363, dyo toda la libertad a los Djudyos i mizmo dyo orden al trezoro del imperyo de arekojer fondos para fraguar el treser Templo. Sea ke las orasyones de los Kristyanos ke no keriyan esto, sea ke las orasyones de los Djudyos ke tambyen no keriyan un Templo antes de la yegada del Mashiyah, los lavoros de konstruksyon no kontinuaron. Los pelegrinos kristyanos ke vijitavan Yerushalayim no dyeron dinguna emportansya al monte ke utilizaron para echar el esyerkol. Savemos ke los Djudyos no se alesharon de Yerushalayim en esta epoka porke kuando la emperatris Eudoxia (401-460) izo su pelegrinasyon a Yerushalayim, fue aklamada kon muncha ardor por los Djudyos ke pudyeron tener su permisyon para suvir al monte Moriah.

Dando este haber a otras komunidades, mas de 100,000 Djudyos vinyeron a Yerushalayim para selebrar Sukot este mizmo anyo. Ama yene las protestas de los Kristyanos fueron sufizyente para ekspulsar los Djudyos de Yerushalayim asta ke vinyeron los Muzulmanos. Entre myentes uvo una epoka kurta de libertad kuando los Sasanides kon el Rey Husrev II (Koshru II) i kon la ayuda de 30,000 Djudyos, entraron a Yerushalayim (613-615 E.K.) (Era Komun). Ama el emperador bizantino famozo, Heraklius, torno de muevo (629 E.K.) i desho la sivdad a la armada Muzulmana kon el Kalif Omar (6381099 E.K.). El Rabi Eleazar Ben Kalir (570-640 E.K.), un Rabi Bizantino ke eskrivyo munchos “Piyutim” (Versos de la Liturjia klasika ke fueron muy konosidos en syertos servisyos komo Tisha be Av) konfirma estos datos. 50 anyos despues de Omar, los dirijentes Emevis de Damasko (Şam) pensaron ke para danyar la ekonomiya de la Mekka, ke el uniko ingreso era la pelegrinasyon, konstruyeron un edifisyo grandiozo kon un tejado en forma de kupola de oro, ensima de la roka del Monte Moriah, para azer vinir los pelegrinos aya, al lugar de la Mekka.

Afilu se dyo la permisyon a los Djudyos de fraguar una Kehila ama en una otra parte de la montanya. Entre los anyos 940-960, un Karait de nombre Salamon be Yeroham, ke bivyo en Yerushalayim, eskrive ke Djudyos no teniyan dinguna restriksyon para azer orasyon en este Monte. En esta epoka los Muzulmanos en Yerushalayim ni danyaron ni se apatronearon de los edifisyos relijyozos, ni de los Kristyanos, ni de los Djudyos. Ama en 1071, kuando los Seldjukis entraron a Yerushalayim, al pareser ke i danyaron i se apatronearon de los edifisyos kristyanos. Esto izo ke el Papa Urban II, en el anyo 1095, demando de salvar Yerushalayim de los “Infideles”.

I Esto kavzo las “Kruzadas”, ke la primera fue en 1099 ande masakraron todos los Muzulmanes i los Djudyos de la sivdad. Malgrado ke deklararon ke la entrada a esta montanya no va ser permetido a los ke no son Kristyanos, Maimonides eskrive ke en el anyo 1165, izo su orasyon en este Monte; Binyamin de Tudela ke estuvo aya tambyen dize ke Djudyos aziyan orasyon en el Monte Moriah. En el anyo 1187, Yerushalayim fue salvada por Saladdin, dando la libertad a todas las kreensyas. Ama en poko tyempo empesaron los debates entre Hahamim, si Djudyos devriyan o no devriyan suvir al Monte, de espanto al no pizar el Santo de los Santos.

Otros dizyendo ke el Monte sin el Bet ha Mikdash, no deve de ser konsiderado komo un lugar sakrado. I otros atestando ke se puede suvir al Monte despues ke va vinir el Mashiah. En la epoka Otomana, el Sultan Suleyman restoro las murayas de la sivdad i permityo a los Djudyos de azer orasyon solo delantre del Kotel ha Maaravi, ke los frankos yaman “el Muro de Lamentasyones” i no suvir mas ariva. Despues de la gerra de Krimea, kon la demanda de los Inglezes, las otoridades Otomanas permityeron a todos de pueder suvir al Monte, ekseptando solo el diya de Vyernes, ke es diya sakrado para los Muzulmanos.

Aun ke aviya esta libertad, los Hahamim kategorikamente refuzaron a ke Djudyos tengan esta libertad. Koza ke no fue muy akseptada porke savemos ke i Moses Montefiore, i el Baron Edmond de Rothschild, entre munchos otros, no izyeron kavzo de este refuzo. En el siglo 19, los elevos del Gaon de Vilna, Eliyahu Ben Shlomo Zalman, yegaron a Yerushalayim formando el gueso de la sekta ke yamamos los “Haredim”, un grupo ke se konsideran komo “Ultra Ortodoks”. Eyos eran i son totalmente kontraryos a ke Djudyos suvan al Monte Moriah. En la gerra de independensya de 1948, el Jeneral David Shaltiyel, komandante de las fuersas sekretas Djudiyas de esta rejyon, alimpyo el lugar de los estranjeros, ama tuvo de alesharse porke este lugar era sakrado i las fuersas de Jordanya se apropriaron de una grande parte de Yerushalayim i klaro kon del monte sakrado.

En 1967, el sigundo diya de la gerra de 6 diyas, el kolonel Mordehay Gur, komandante de esta rejyon, deklaro al mundo entero ke “el Monte Moriah, 2000 anyos despues ke fue perdido, esta agora debasho del kontrol del puevlo Djudyo”. El Rav Shlomo Goren, kon el Rulo de la Tora en un braso i el shofar en la otra mano, izo la mizma deklarasyon. Kon la “intifada del anyo 2000, el Monte de muevo se serro a los ke no son Muzulmanos i en el anyo 2003, de muevo se avryo a la vijita de todo el mundo, a kondisyon ke no va aver dinguna orasyon, ni de la komunidad Kristyana, ni de la komunidad Djudiya.

Fuente: F.M.Loewenberg