La Mar en Estanbol

Aze tyempo ke mi mujer Anna eskrivyo un artikolo sovre los banyos de mar kon el titulo “De las plajes a los Beaches”. Esto me izo pensar a la manera ke tuvimos para pasar de los “Hamam de mar a las Plajes”. Porke en la epoka otomana, banyarse en la mar no era koza konosida por el publiko. I mas i mas, en un payiz komo el Imperyo Otomano ande la grande mayoriya de la povlasyon syendo Muzulmana, banyarse en la mar no puediya ser akseptado de dinguna forma. Fue despues de la mitad del siglo 19, ke permityeron de fraguar en la mar kazas enteras serradas para permeter a los ombres i a las mujeres separamente de entrar a la mar.

El eskritor Ragıp Akyavaş, en su livro Asitane, dize ke “Las ermozas de Bene Israel viniyan de Yeldeğirmeni i mizmo de Balat al hamam de Haydarpaşa, i al Hamam de Moda se ivan las Kokonas de la minoriya Franka”. Es ke komo banyos se konosiyan los banyos de Haydarpaşa, de Moda, de Caddebostan i de Fenerbahçe. Mas despues izyeron banyos tambien en Beyaz Park al lado de Büyükdere, en Salacak, en Küçüksu... Segun la relijyon Muzulmana, no aviya dinguna restriksyon para entrar a la mar. Ama algunos doktores eskriviyan konsejos para los ke keriyan banyarsen aya: En un artikolo sovre el Hamam de Mar, eskrito en 1889 por un doktor de la marina Otomana, dize “Sin tener la aprobasyon del doktor, nunka se deve entrar a la mar.

Inkluzo la ora ke se va entrar a la mar, es el doktor ke deve de desidir. Los ke biven en un kazal leshos de la mar i ke vyenen para banyarsen, deven de asperar a lo menos tres diyas antes de entrar a la mar. No entrar antes ke la kashkara del karpuz se kayga a la mar. El mijor tyempo para banyarse, es la fin del enverano i el empesijo del otonyo. La kreyensa ke dize “entrar a la mar entre el 20 de Junyo i el 11 de Agosto no es sano por la salud” es una superstisyon i no es verdad. Los adultos no deven de banyarsen djusto kuando amanese, ni despues ke se echa el sol.

El mijor tyempo devriya ser entre dos oras antes de midi i sinko oras despues. No entrar a la mar antes de eskapar la dijesyon. Los adultos deven entrar o ambyertos, o tres oras i medya despues de komer. Los ijikos chikos ya pueden entrar dos oras despues de komer. No meter a la mar los chikos antes ke eskapen los sesh anyos. Segun el doktor Ahmed Şükrü de Adana, mizmo vyejos ke pasaron los kuarenta i sinko anyos no deven de entrar a la mar. Si se atreven de entrar, pueden sufrir de almoranas. El doktor Salahaddin Ali de Beşiktaş diziya ke las aguas de Hasköy i Balat no son limpyas para banyarse.

En el Bosfor, solo las aguas de Arnavutköy son limpyas. Tambyen son limpyas las aguas de Makriköy (Bakırköy), de Fenerbahçe i de las Adas. Para entrar a la mar, el ombre i la mujer deven de taparsen asta el diz. La moda de plaj empeso kon los emigrantes Rusos. Los Rusos Blankos, perdyendo la lucha kontra los ke izyeron la revolusyon de 1917, fuyeron por la Mar Preta a Estanbol i se establesyeron en los kampamementos serka de Florya. En el famozo restoran Rejans, las Rusas ke lavoravan aya se davan a konoser komo si fueran Kontesas. En Florya, empesaron a echarsen en la arena i tomar sol, entrar a la mar ombres i mujeres endjuntos.

Esto plazyo muncho antes de todo a las minoriyas i kon el tyempo i myembros de la komunidad Turka Muzulmana mas laikas tomaron plazer de azer la mizma koza. Esta moda, despues de Florya, se vido tambyen en Moda i en Büyükada. Una koza ke ayudo muncho a la propagasyon de esta moda fue la vizyon de muestro primer Prezidente de la Republika Turka, el immortal Atatürk ke, en Florya, entro a la mar kon un mayo kurto. La kaza ke se konstruyo aya sirvyo mizmo para kombidar lideres de otros payizes, komo el rey de Ingletierra, Edwardo 8 en 1936, i en 1937, el rey de Jordanya, Abdullah. La moda de plaj trusho otra moda ke eran los gazinos detras de la plaj.

La djente pasava el diya en la plaj i por la tadre, se iva al gazino para komer i baylar el tango, el fokstrot, el charleston o oyir kantantes famozos komo Zeki Müren, Müzeyyen Senar... mas i mas los diyas de Shabat i Alhad. Los gazinos de Caddebostan, de Beyaz Park, de Bebek, de Salacak, de Moda eran los mas famozos. Agora ke estamos serrando la sezon de entrar a la mar, Saver es Bueno de akodrar lo ke era antes. Fuente: Zafer Toprak, Ekspozisyon del Muzeo de Pera “Del Hamam de Mar a la Plaj”